कैलाली- गत आर्थिक वर्षमा कैलालीको टीकापुर पार्कमा साढे दुई लाखभन्दा बढी पर्यटकले अवलोकन गरेका छन्। आर्थिक वर्ष २०८१/८२ मा दुई लाख ५३ हजार चार सय ६८ जना आन्तरिक पर्यटकले टीकापुर पार्कको अवलोकन गरेका हुन्।

टीकापुर नगरपालिकाको मातहतमा रहेको टीकापुर पार्कबाट नगरपालिकाले गत आवमा ९३ लाख ४४ हजार चार सय १०  राजस्व संकलन भएको छ। आव २०८०/८१ मा नगरपालिकाले पार्कबाट ६३ लाख ९७ हजार एक सय ७५ राजस्व संकलन गरेको थियो।

टीकापुर नगरपालिकाका राजस्व शाखा प्रमुख नन्द केसीले दिएको जानकारीअनुसार गतवर्ष दुई लाख १८ हजार दुई सय ८ जना स्वदेशी पर्यटकले पार्कको अवलोकन गरेका थिए। जसबाट ६५ लाख ४६ हजार दुई सय ४० राजस्व संकलन भएको छ भने ३५ हजार दुई सय ६० जना विद्यार्थी तथा जेष्ठ नागरिकहरूले पार्क अवलोकन गरेका छन्।

उनीहरूबाट  नगरपालिकाले पाँच लाख ५८ हजार ९ सय राजस्व संकलन भएको देखिन्छ। त्यतिमात्र नभई पार्क अवलोकनमा आउने पर्यटकहरुको सवारीसाधन पार्किङबाट मात्रै आठ लाख ३७ हजार एकसय रुपैयाँ राजस्व उठेको नगरपालिकाका राजस्व शाखा प्रमुख केसी बताउँछन्।

त्यसैगरी पिकनिक स्पट, फोटोग्राफी, क्यामरालगायत विविधबाट १४ लाख ३२ हजार एकसय ७० रुपैयाँ संकलन भएको छ। पार्कमा रहेको वीरेन्द्र विश्राम घर पर्यटकका लागि खुला गरिएपछि पछिल्लो समय पर्यटकहरुको आवागमन बढ्दै गएको हो।

पार्कमा पछिल्लो समय दैनिक करिब पाँच सय पर्यटन अवलोकनका लागि आउने गरेका छन्। पार्कमा व्यावसायिक फोटोग्राफी सञ्चालन भएपछि पनि पर्यटकको संख्या बढेको देखिन्छ। अहिले पार्कभित्र करिब ३५ जना युवाहरू व्यावसायिक फोटोग्राफीको काम गर्दै आएका छन्।

टीकापुर नगरपालिका-३ का नैनबहादुर चौधरी कुखुरापालन व्यवसाय छोडेर दुई वर्षदेखि फोटोग्राफरको काम गर्दैछन्। कुखुरापालनबाट भन्दा राम्रो आम्दानी फोटोग्राफीबाट हुने भएपछि  यतातिर लागेको उनको भनाइ छ।

‘सुरुवातका दिनमा धेरै राम्रो आम्दानी थियो, दिनमै चार/पाँच हजार रुपैयाँसम्म कमाउन सकिन्थ्यो’ उनी भन्छन्, ‘आम्दानी राम्रो देखेपछि कुखुरापालन व्यवसाय छोडेर यता लागेको हुँ, तर अहिले धेरैजना यसैमा जोडिएका कारण त्यस्तो आम्दानी छैन।’

पार्कभित्र फोटोग्राफीको काम गर्ने अधिकांश युवाहरू अध्ययनसँगसँगै फोटोग्राफरको काम गर्दैछन्। टीकापुर स्थिति खड्ग स्मृति माध्यमिक विद्यालयबाट कक्षा १२ को परीक्षा दिएका सुनिल चौधरी पनि पार्कमा फोटोग्राफीको काम गर्छन्।

उनले फुर्सदको समयलाई सदुपयोग गर्दै दैनिक दुईदेखि तीन हजार आम्दानी गर्दै आएको बताए। ‘सबै दिन एउटै किसिमको हुँदैन। कुनै दिन बढी हुन्छ त कुनै दिन हुँदैन’ सुनिल भन्छन्, ‘आफ्नो अध्ययनको खर्च अनि कोठाको खर्च व्यवस्थापनमा कुनै समस्या छैन।’

नगरपालिकाले चालू आर्थिक वर्षबाट पार्कको प्रवेश शुल्क वृद्धि गरेको छ। यसभन्दा पहिलेप्रति व्यक्ति ३० रुपैयाँ लाग्दै आएको शुल्क बढाएर ५० पुर्‍याइएको छ। त्यसैगरी विद्यार्थी, अपांगता भएका व्यक्ति र ज्येष्ठ नागरिकहरूले यसभन्दा पहिले प्रतिव्यक्ति १५ तिर्दै आएकोमा अब ३० तिर्नुपर्ने हुन्छ।

नगरपालिकाको आर्थिक ऐन २०८२ अनुसार उक्त दर हेरफेर गरिएको नगरप्रमुख रामलाल डगौरा थारुले जानकारी दिए। त्यसैगरी प्रतिदिन एक सयमा व्यावसायिक फोटोग्राफीको काम गर्दै आएका व्यवसायीको शुक्ल वृद्धि गरेको छ।

अहिले प्रतिदिन फोटोग्राफरले पार्कभित्र फोटो खिचेको दुई सय शुल्क तिर्नुपर्ने भएको छ। ‘आवश्यकता र औचित्यका आधारमा धेरैपछि पार्कको प्रवेश शुल्कलगायतका करका दरमा हेरफेर गरिएको छ’ नगरप्रमुख थारुले भन्छन्, ‘यसलाई कार्यान्वयन गर्दै पार्कलाई थप व्यवस्थित र रमणीय बनाउँदै लगिने छ।’ रासस