काठमाडौं- असार २४ गतेको बाढीले २५० मेगावाट विद्युत उत्पादन टुटेको नेपाल विद्युत प्राधिकरणले जनाएको छ।

प्राधिकरणले बुधबार प्रोस विज्ञप्ति जारी गर्दै निजी क्षेत्र र सरकारको स्वामित्वमा सञ्चालित आयोजनाहरुको उत्पादन टुटेको जनाएको हो। सोमबार राति चीनको सीमा क्षेत्र भोटेकोशी नदीमा बाढी गएको थियो।

बाढीबाट रसुवागढी जलविद्युत आयोजनाको हेडवक्र्समा पूर्ण क्षति, चिलिमे जलविद्युत आयोजनाको टेलरेसबाट पानी पसेको, त्रिशुली थ्रिएको ड्यामतर्फका दुई वटा गेटमा क्षति र त्रिशुली थ्रिबीको सब-स्टेशनमा खोलाले धार परिवर्तन गरी पानी भित्र पसेर १३२ केभीको संरचनामा क्षति पुर्‍याएको छ।

त्यस्तै निजी क्षेत्रबाट सञ्चालनमा रहेको अपर मैलुङटाँडी गरी लगभग २५० मेगावाट विद्युत प्रणालीबाट बिच्छेद भएको बताइएको छ।

भोटेकोशीमा बाढी गएपछि प्राधिकरणका कार्यकारी निर्देशक एवं प्रशारणलाइन निर्देशनालयका निमित्त उपकार्यकारी निर्देशक राजन ढकालसहितको प्राविधिक टोली निरीक्षण गर्न आयोजना स्थल गएको प्राधिकरणले जनाएकाे छ।