रामेछाप- रामेछापको खाँडादेवी गाउँपालिका र सिन्धुलीको सुनकोशी गाउँपालिका जोड्ने पुछिघाटको झोलुंगे पुल अस्थायी रूपमा मर्मत गरिएको छ। वर्षायाम सुरू भएसँगै पुल मर्मत हुँदा यहाँका स्थानीय खुसी भएका छन्।

गत असोजमा परेको अविरल वर्षाका कारण सुनकोशी नदीमा आएको बाढीले यहाँको पुल पूर्ण रूपमा क्षति हुँदा सुनकोशी नदी वारपार गर्न स्थानीयले ९ महिनादेखि कठिनाइ भोग्दै आइरहेका थिए।

खाँडादेवी गाउँपालिकाको वडा नम्बर ४ पुछिघाट र सिन्धुलीको सुनकोशी गाउँपालिकाको वडा नम्बर ६ चैनपुर जोड्ने एक सय ८० मिटर लम्बाइको पुल रामेछापतर्फको ३० मिटर भाग बाढीले पूर्ण रूपमा क्षति पुर्याएको थियो।

विद्यार्थी, कर्मचारी र किसानलाई वर्षात्मा आवतजावत गर्न सहज होस् भनेर खाँडादेवी गाउँपालिकाको विपद व्यवस्थापन कोषअन्तर्गको चार लाख ५० हजार रुपैयाँलागतमा अस्थायी रूपमा पुल मर्मत गरिएको गाउँपालिकाका अध्यक्ष ज्ञानकुमार श्रेष्ठले बताए।

यस गाउँपालिकाअन्तर्गतका कोथवे, बेलघारीलगायत अन्य स्थानका झोलुंगे पुल आंशिक रूपमा मात्र क्षति भएका कारण यसअघि नै स्थानीय स्रोतसाधन परिचालन गरी मर्मत गरेर सञ्चालनमा ल्याइसकिएको प्राविधिक हरिशचन्द्र बराल बताउँछन्।

बीचबीचमा काठको फल्याक र किनारमा बाँसको बार बनाएर अस्थायी रूपमा भए पनि नदी वारपार गर्न सहज बनाइदिएपछि जोखिमपूर्ण रूपमा गर्नुपरेको डुंगा यात्राको समस्या समाधान भएको पुछिघाटकी स्थानीय शिक्षक दुर्गा महत बताउँछिन्।

उक्त पुल मर्मत भएसँगै खाँडादेवी-४ बाट सुनकोशी गाउँपालिकाको दीर्घ प्रदिम माविमा अध्ययन गर्न जाने दुई दर्जनभन्दा बढी बालबलिका, खाल्टेमा खेती गर्न जाने अधिकांश किसान र खाल्टेबाट  खाँडादेवी वारिपारी गर्ने कर्मचारीलाई निकै सहज भएको स्थानीय इन्द्रबहादुर श्रेष्ठले बताए।

यसअघि भएको पुलको क्षतिपश्चात जिल्ला प्रशासन कार्यालयले व्यवस्था गरिदिएको डुंगा (र्‍याफ्टिङ) भरपर्दो र विद्यार्थीको समयानुकूल नभएपछि विद्यार्थी र किसान यही पुलबाट जोखिम मोलेर भए पनि नदी वारपार गर्न बाध्य थिए। अस्थायी रूपमा मर्मत भएको उक्त झोलुंगे पुल लामो समयसम्म नटिक्ने हुनाले यसलाई स्थायी रूपमै बनाउन पहल गर्न स्थानीयले अनुरोध गरेका छन्। रासस