भोजपुर- ‘ग्रेटर मुन्दुम पदमार्ग’ निर्माणले तीव्रता पाएको छ। जिल्लाका दक्षिणी क्षेत्रका तीन स्थानीय तहमा पदमार्ग निर्माणले गति लिएको हो। सुनसरीको कोसी टप्पु, उदयपुरको बेलका नगरपालिकाको मैनामैनी, भोजपुर हतुवागढीको माइबेनी हसनपुर हुँदै सेल्मे, तावाभञ्ज्याङसम्म पदमार्ग जोड्ने लक्ष्यका साथ ग्रेटर मुन्दुम पदमार्ग निर्माण भइरहेको छ।

भोजपुरको हतुवागढी, आमचोक र रामप्रसादराई गाउँपालिकामा पदमार्ग निर्माणको काम तीव्ररुपमा अघि बढेको छ। हतुवागढी गाउँपालिका-९ हसनपुरको होम्पुवा भञ्ज्याङबाट पदमार्ग निर्माण भइरहेको गाउँपालिका अध्यक्ष प्रेमकुमार राईले बताए। पदमार्गको शून्य बिन्दु माइबेनी भए पनि हाललाई होम्बुवाबाट काम अघि बढेको उनले जानकारी दिए। यहाँ स्वीस सरकारसँगको साझेदारीमा करिब ३२ लाख रूपैयाँ लागतमा पदमार्ग निर्माण भइरहेको छ। 

हतुवागढी-३ सिन्द्राङमा संघीय सरकारको १८ लाख रूपैयाँ लागतमा पदमार्ग निर्माण भइरहेको अध्यक्ष राईको भनाइ छ। तोसिखोमबाट सङ्खाम जोर आहालसम्म पदमार्ग निर्माण गरिनेछ। रामप्रसाद राई गाउँपालिकामा चालु आर्थिक वर्षमा एक हजार ३ सय मिटर पदमार्ग निर्माण गरिनेछ।

यहाँ वडा नं ६ मा पर्ने थाम डाँडा, गोल्मे राजा, गोल्मे रानी आसपासमा काम भइरहेको उनले जानकारी दिए। हालसम्म करिब २ सय मिटर पदमार्ग निर्माण सम्पन्न भएको छ। रामप्रसादराई गाउँपालिकामा पहिलो चरणमा करिब ३० लाख रूपैयाँ लागतमा पदमार्ग निर्माण भइरहेको छ।

त्यस्तै, आमचोक गाउँपालिकामा करिब दुई किलोमिटर पदमार्ग निर्माण सम्पन्न भएको गाउँपालिकाले जनाएको छ। यहाँ दाबुराङबाट थाम डाँडासम्म पदमार्ग निर्माण हुनेछ। चार वर्षसम्म निर्माण हुने ग्रेटर मुन्दुम पदमार्ग निर्माणमा स्वीस सरकारको ५५ प्रतिशत, प्रदेश सरकारको १९ प्रतिशत, स्थानीय सरकारको १८ प्रतिशत तथा संघीय सरकारको ८ प्रतिशत लागत साझेदारी हुने बताइएको छ।

ग्रेटर मुन्दुम पदमार्ग सुनसरीको कोसी टप्पुबाट सुरु भएर उदयपुरको मैनामैनी भोजपुर हतुवागढीको माइबेनी, शिलासुत्केरी, सङ्खामचुली, आमचोक गाउँपालिकाको बयाङ, यूँ, रामप्रसाद राई-६ थामडाँडा, गोल्मे भिर, सुच्चागुफा नागछाँगा, वडा नं २ को पाप्माखाम गढी, बतासे र वडा नं १ ओख्रे हुँदै टेम्केमैयुङ-९ को कपासे भञ्ज्याङसम्म विस्तार हुने रामप्रसाद राई-६ वैकुण्ठेका वडाध्यक्ष एकराज आचार्यले बताए।

तावाभञ्ज्याङमा यसअघि निर्माण भएको मुन्दुम पदमार्गसँग जोडिएसँगै भोजपुर साल्पासिलिचुङसम्म पुग्दा यो पदमार्गको लम्बाइ करिब १६८ किलोमिटर हुने छ। यो कार्यक्रम २०८५ सालसम्म सञ्चालन हुनेछ। पदमार्गमा आधारित पर्यटन विकास परियोजना विराटनगरअन्तर्गत काम भइरहेको छ। रासस