गण्डकी- प्रकृतिप्रेमी पर्यटकलाई लक्ष्य गरी कास्कीको पोखरा महानगरपालिका-३१ पचभैयामा हिमालयन फरेष्ट रिसोर्ट सञ्चालनमा ल्याइएको छ। ११ करोड रुपैयाँको लगानीमा बनेको उक्त रिसोर्टमा ११ जनाले रोजगारी पाएका सञ्चालक प्रमोद भण्डारीले बताए। 

पोखराको दोस्रो ठूलो ताल बेगनास र रुपाताल घुम्न आउने आन्तरिक तथा बाह्य पर्यटकका लागि सुविधायुक्त रिसोर्ट सञ्चालन गरेको उनको भनाइ छ। रिसोर्टमा विभिन्न श्रेणीका २१ वटा कोठा छन्।

'न्यूनतम दुई हजारदेखि बढीमा ५ हजार ५ सय सम्मका कोठा हामीकहाँ छन्, खानामा पनि स्वदेशी र विदेशी दुवै परिकार उपलब्ध छ', सञ्चालक भण्डारीले भने। रिसोर्टमा एक दिनमा ६० जनासम्म पाहुना राख्ने क्षमता छ।  

ताल, हिमाल, वनजंगललगायत प्राकृतिक सम्पदाको दृश्यावलोकनका लागि पर्यटक पचभैया पुग्ने गर्छन्। चरा अवलोकनका लागि पनि उक्त क्षेत्र उपयुक्त मानिन्छ।

'पोखराको व्यवस्त दैनिकी र कोलाहल छलेर शान्त रात बिताउन पर्यटक बेगनास क्षेत्रमा आउने गरेका छन्', उनले भने, 'प्राकृतिक वातावरण आतिथ्य सेवा दिने उद्देश्यले रिसोर्ट सञ्चालनमा ल्याइएको हो।' रिसोर्टको औपचारिक उद्घाटन नभए पनि दुई महिनादेखि सेवा दिन सुरु गरेको उनले बताए। 

पोखराको बैदाममा विगत १८ वर्षदेखि अन्य व्यवसाय गर्दै आउनुभएका भण्डारीले रिसोर्टमा पहिलोपटक लगानी गरेका हुन्। शिक्षण पेसामा रहँदा पचभैया मन परेपछि जग्गा किनेको र अहिले सोही ठाउँमा रिसोर्ट खोलेका हुन्। 'स्वदेशमै आत्मनिर्भर बन्नुपर्छ सोचले रिसोर्टमा लगानी गरेको हुँ', उनले भने। 

उक्त क्षेत्रमा महँगादेखि सामान्यस्तरका होटल तथा रेष्टुराँ सञ्चालनमा छन्। लेखनाथ होटल तथा रेष्टुँरा एशोसियसनका अध्यक्ष वीरभद्र कँडेलले त्यस क्षेत्रमा १३७ होटल तथा रेष्टुराँ व्यवस्था सञ्चालन रहेको जानकारी दिए। 

ठूलो लगानीका रुपाकोट रिसोर्ट, बेगनास रिसोर्टलगायतका रिसोर्ट तथा होटलले स्वादेशी र विदेशी पर्यटकलाई आतिथ्य सेवा दिँदै आएका छन्। प्राकृतिक सुन्दरता, मठमन्दिर, जातजातिको विविधतापूर्ण बसोबास, मौलिक संस्कृति, रहनसहन, स्थानीय उत्पादन आदिले बेगनास क्षेत्रमा पर्यटकलाई आकर्षित गर्ने गरेको छ। 

सात तालको बाटिका भनेर चिनिने लेखनाथ क्षेत्रमा बेगनास ताल पर्छ। बेगनास नजिकै उस्तै रमणीय रुपा, दिपाङ, खास्टे, न्युरेनीलगायत ताल अवस्थित छन्। पोखराको पृथ्वीचोकदेखि १४ किमि र तालचोकदेखि साढे तीन किमी यात्रापछि बेगनास पुग्न सकिन्छ।

बेगनास क्षेत्रमा स्तरीय सडक पूर्वाधार र बसपार्कको भने समस्या छ। तालचोक-बेगनास सडक विस्तार सुस्त गतिमा हुँदा पर्यटन क्षेत्र मारमा परेको पर्यटन व्यवसायीहरुको गुनासो छ। रासस