लमजुङ- गण्डकी प्रदेशअन्तर्गत पहाडी जिल्ला लमजुङमा एक हजार रोपनी क्षेत्रफल जमिनमा अकबरे खुर्सानीखेती गरिएको छ। दोर्दी गाउँपालिकामा ७ सय र मर्स्याङ्दी गाउँपालिकामा ३ सय रोपनी गरी उक्त क्षेत्रफलमा खुर्सानीखेती गरेको हो।

गाउँपालिकाको प्राविधिक सहयोग र अनुदानमा दुई पालिकाका किसानले व्यावसायिकरुपमा अकबरे खुर्सानीखेती गरेका हुन्। गाउँपालिकाले चालु आर्थिक वर्षमा अकबरे खुर्सानीखेतीका लागि ३० लाख रूपैयाँ बजेट विनियोजन गरेको थियो।

कृषि सहकारी उत्पादन तथा बजारीकरण, सुदृढीकरण कार्यक्रमअन्तर्गत अकबरे खुर्सानीखेतीका लागि विनियोजित बजेटबाट खुर्सानीखेतीका लागि सहयोग गरिएको गाउँपालिका अध्यक्ष युवराज अधिकारीले बताए। उनका अनुसार व्यावसायिक खेती गर्ने कृषकलाई पालिकाले प्राविधिक सहयोगसँगै मल्चिङ, खुर्सानीको बीउमा ५० प्रतिशत अनुदान दिएको छ। 

गाउँपालिकाका अनुसार यसअघि गत वर्ष दोर्दी गाउँपालिका-४ बाँसबोट, कामचोक र साँधिखोला गाउँमा किसानले व्यावसायिकरुपमा अकबरे खुर्सानीखेती गरेका थिए। परम्परागत रुपमा कोदोखेती गर्दै आएको जमिनमा खुर्सानीखेती गरेका किसानहरुले राम्रो आम्दानी गरेपछि यसवर्ष पालिकाले खुर्सानी पकेट क्षेत्र विस्तार गरेको कृषि शाखा प्रमुख निराजन पौडेलको भनाइ छ।

गतवर्ष पनि अकबरे खुर्सानीखेती गरेको वडा ४ स्थित साना किसान सहकारीले यसवर्ष १२ रोपनी क्षेत्रफलमा खुर्सानीखेती गरेको छ। परीक्षणको रुपमा पहिलोपटक गतवर्ष अकबरे खुर्सानीखेती सुरु गरी राम्रो आम्दानी गर्न थालेपछि दोर्दीका किसान यसपटक उत्साहित बनेका छन्। गत वर्ष उक्त समूहले २० लाख रूपैयाँभन्दा बढी आम्दानी गरेको बताइएको छ। 

यसवर्ष लगाइएको खुर्सानी ४ सयदेखि ५ सय मेट्रिकटन उत्पादन हुने र करिब पाँच करोड रूपैयाँ आम्दानी गर्ने अनुमान रहेको कृषि शाखा प्रमुख पौडेलले बताए। उनले भने, 'कम लागतमा धेरै आम्दानी गर्न सकिने बाली खुर्सानी रहेको र यसको बजारको माग पनि राम्रो रहेको छ। 

त्यस्तै, मर्स्याङ्दी गाउँपालिकाको नौवटै वडामा गरेर ३ सय रोपनी क्षेत्रफलमा अकबरेको व्यावसायिक खेती गरिएको गाउँपालिका अध्यक्ष अर्जुन गुरुङले बताए। उनले भने, 'अकबरे खुर्सानीको व्यावसायिक खेतीबाट किसानको जीवनस्तर उकास्ने उद्देश्यले अभियान सञ्चालन गरिएको र यसले पालिकाको आर्थिक समृद्धिमा टेवा पुग्ने विश्वास लिएका छौँ। अकबरे खेतीका लागि गाउँपालिकाले २० लाख रूपैयाँ विनियोजन गरेको थियो।

यसमध्ये १० लाख रूपैयाँ अन्नपूर्ण संरक्षण क्षेत्र आयोजना (एक्याप) ले सहयोग गरेको छ। आयोजनाको क्षेत्रमा पर्ने वडा नंं १, २, ३, ४ र ९ का लागि गाउँपालिकामार्फत एक्यापले रकम उपलब्ध गराएको थियो। अकबरे खेतीका लागि गाउँपालिकाले बिरुवामा ८० प्रतिशत र मल्चिङ प्लाष्टिकका लागि ५० प्रतिशत अनुदान दिएको गाउँपालिकाले जनाएको छ। यहाँका किसानले कम्तीमा एक रोपनी र बढीमा १० रोपनीसम्म खेती गरेका छन्। 

किसानले उत्पादन गरेको अकबरेको बजारीकरणका लागि पालिकाले सहयोग गर्ने भएको छ। बजारीकरणका लागि पालिकामै मासिक हाटबजारको व्यवस्थासँगै जनता एग्रो कम्पनीसँग बिक्री सम्झौता भएको गाउँपालिका अध्यक्ष गुरुङको भनाइ छ। जिल्लामा उत्पादन कम हुँदा हालसम्म बाहिरी जिल्ला र भारतबाट ल्याएको खुर्सानी स्थानीयले खरिद गरेर प्रयोग गर्दै आएको छ। रासस