म्याग्दी- म्याग्दीमा गण्डकी प्रदेश सरकारद्वारा सञ्चालित सात वटा बहुवर्षीय सडक आयोजना निर्माण ठप्प भएका छन्। बजेट अभावका कारण गत चैत महिनादेखि सडक निर्माण ठप्प भएको हो।

गत वर्ष प्रदेश सरकारले म्याग्दीमा सात वटा सडक स्तरोन्नति र दुई वटा मोटरेबल पुल निर्माणका लागि विभिन्न निर्माण कम्पनीसँग ६७ करोड ७८ लाख रुपैयाँमा ठेक्का सम्झौता गरेको थियो। अर्थ मन्त्रालयले एक अर्ब २० करोड रुपैयाँ बजेटको स्रोत सुनश्चितता गरेको थियो।

तीन वर्षमा सम्पन्न गर्ने लक्ष्यसहित गत वर्ष ठेक्का सम्झौता भएका तीन आयोजनामा यस वर्ष एक करोड ५० लाख देखि दुई करोड रुपैयाँ मात्र बजेट विनियोजन भएको थियो। सरकारले स्रोत सहमति र सुनश्चितता गरेर बहुवर्षीय ठेक्का सम्झौता भइसकेका योजनाका लागि पर्याप्त बजेट व्यवस्थापन नगरेक‍ो हो।

जसकारण निर्माण प्रभावित भएको गण्डकी प्रदेशसभा सदस्य रेशम बहादुर जुग्जालीले बताउँछन्। ‘विनियोजन भएको बजेट हिउँद सकिएपनि सबैजसो निर्माण कम्पनीले चैतसम्म काम गरिरहेका थिए’, उनले भने, ‘सरकारले रकमान्तर अथवा अन्य स्रोत व्यवस्थापनमा ढिलाइ गर्दा रोकिएको निर्माण नयाँ आर्थिक वर्ष नलाएसम्म सञ्चालन हुने देखिएन।’

विषयगत मन्त्रालयका सचिव, मन्त्री र मुख्यमन्त्रीलाई काम भइरहेका तथा सम्पन्न हुने चरणका योजनामा बजेट अभाव हुन नदिन आग्रह गरेपनि वेवास्ता गरेका जुग्जालीले गुनासो गरे। बेनी-पाखापानी, बेनी-दरवाङ, धारापानी-ताकम-शिवाङ, अदिभारा-डाडागाउँ, पखेर-बङ्जा, बगरफाँट-भकिम्ली सडक आयोजना पूर्ण रुपमा ठप्प छन्।

खारा-बिम सडक र शिवरात्रिखोला मोटरेबल पुलका ठेकेदारले कामको गति घटाएका छन्। चित्रे-घोडेपानी सडक र दरखोला मोटरेबल पुल योजनाका ठेकेदारले निर्माण सुरु नै गरेका छैनन्। पूर्वाधार विकास कार्यालय म्याग्दीले चैतमा बहुवर्षीय योजनाहरुका लागि मन्त्रालयमा १३ करोड ९० लाख रुपैयाँ थप बजेट प्रस्ताव गरेको थियो।

बेनी-दरवाङ सडकको तेस्रो खण्डका ठेकेदार बिरुवा-क्याराभानलाई मात्र आन्तरिक रकमान्तर मार्फत एक करोड रुपैयाँ भुक्तानी भएको छ। पूर्वाधार विकास कार्यालय, म्याग्दीका प्रमुख विष्णुप्रसाद पौडेलले विनियोजित बजेट भुक्तानी भइसकेको र रकमान्तर अथवा थप बजेट व्यवस्थापन नहुँदा निर्माण व्यवसायीलाई भुक्तानी दिन नसकेको बताए।

अर्जेखोलाको मोटरेबल पुलका ठेकेदारले गत असारमै लक्ष्यभन्दा एक वर्ष अघिनै काम सकेपनि अझै भुक्तानी पाएका छैनन्। अदिभारा मोटरेबल पुलका ठेकेदारले भने बजेट सकिएपनि निर्माणलाई पूर्णता दिने उद्देश्यले काम गरिरहेका छन्।

पखेर-बरङ्जा सडक योजनाका निर्माण व्यवसायी जीवन रोकायाले सरकारले बजेट व्यवस्थापन गर्न नसकेपछि निर्माण स्थगित गरेको बताए। रासस