काठमाडौं- नेपाल नागरिक उड्डयन प्राधिकरणले गौतम बुद्ध अन्तर्राष्ट्रिय विमानस्थलसँगै रात्रिकालीन उडान हुने विमानस्थलमा पनि क्यालिब्रेसन उडान गर्ने भएको छ।

एरोथाईको क्यालिब्रेसन टिम र जहाज नेपाल आएको बेला थप अन्य ८ वटा विमानस्थलमा समेत क्यालिब्रेसन उडान हुने प्राधिकरण महानिर्देशक प्रदीप अधिकारीले जानकारी दिए।

नयाँ निर्माण सम्पन्न भएको गौतम बुद्ध अन्तर्राष्ट्रिय विमानस्थलमा क्यालिब्रेसन उडानका लागि एरोथाईको क्यालिब्रेसन उडान गर्ने जहाज फागुन ५ गते जहाज नेपाल आउँदै छ।

फागुन ६ गतेबाट सुरु हुने क्यालिब्रेसन उडानका लागि अहिले एरोथाईका प्रतिनिधिले विमानस्थलमा स्थलगत निरीक्षणका काम गरिरहेका छन्। जहाज आएपछि फागुन ६ गतेबाट क्यालिब्रेसन उडान हुने महानिर्देशक अधिकारी बताउँछन्।

योसँगै रात्रिकालीन उडान हुने त्रिभुवन अन्तर्राष्ट्रिय विमानस्थलसँगै थप अन्य विमानस्थलमा पनि एरोथाईले क्यालिब्रेसन उडान गरिदिने भएको छ।

उनका अनुसार सिमरा, जनकपुर, भैरहवाको पुरानो विमानस्थल, नेपालगञ्ज, विराटनगर, धनगढी र भद्रपुर विमानस्थलमा पनि क्यालिब्रेसन उडान हुन लागेको हो।