आइतबार, चैत ३ गते २०८१    
आइतबार, चैत ३ २०८१
images
images

इलाममा उत्पादित मिठाइको माग भारतसम्म

images
बिजनेस न्युज
बिजनेस न्युज
आइतबार, फागुन २५ २०८१
images
images
इलाममा उत्पादित मिठाइको माग भारतसम्म

'इलाम आउँदा चिया बगानमा फोटो खिचेर मात्र हुँदैन, इलामबाट छुर्पी, बम्बइसन र ललिपप पनि खरिद गरेर लग्नैपर्छ भन्ने मान्यता नै स्थापित भएको छ।'

images
images

इलाम-  सूर्योदय नगरपालिकाको प्रमुख पर्यटकीय गन्तव्य कन्याम र श्रीअन्तु हो। गर्मीयाम सुरु भएसँगै यहाँ आउने पर्यटकको सङ्ख्यामा पनि वृद्धि हुँदैछ।

images
images

कन्यामको चियाबारीमा फोटो, भिडियो लिएपछि चिसो मौसममा रमाउँदै अन्तु पुगेर पोखरीमा डुङ्गा सयर गर्ने, बिहानको भुल्के घाम हेर्ने र फर्किने औसत पर्यटकको ‘सेड्युल’ हुन्छ। तर, घुमफिर गरेर घर फर्किँदा पर्यटक रित्तै जाँदैनन्। उनीहरु नगरपालिकाको केन्द्र फिक्कल बजार पुगेर कोसेली किन्छन्।

images
images

दुग्धजन्य उत्पादन छुर्पी, घ्यू, ललिपप र बम्बइसन साथै चिया र अकबरे कोसेलीका रूपमा लगिने गरेको छ। 'कार्यालयमा साथीहरूले इलामको कोसेली खोई भन्छन्', चितवनबाट घुम्न आएका रोशन सापकोटाले भने, 'ललिपप नलिई नआउनु भनेका छन्। ६ हजार रुपैयाँको किनिसके, जुन हेर्‍यो, त्यहीँ लैजानुजस्तो छ।'

images
images

कोसेली सामान बिक्रीका लागि बजारमा लहरै सजाएर राखिएको छ। एउटा पसलले सामान्यतया पाँचदेखि १० हजारसमम्म बिक्री गर्छन्। फिक्कलमा सयभन्दा बढी पसल खुलेका छन्।

'हिजो रु नौ हजारको बिक्री भयो। कुनै दिन चार हजारको मात्रै बिक्छ। सिजन सुरु हुँदैछ। पोहोर त सिजनमा दिनकै ३० हजार रुपैयाँसम्म बेचेको', स्थानीय सुजन सापकोटाले भने।

यहाँ आउने पर्यटक खाली हात जाँदैनन्। कुनै न कुनै कोसेली बोकेर जाने चलन नै बसिसकेको स्थानीय बताउँछन्। 'इलाम आउँदा चिया बगानमा फोटो खिचेर मात्र हुँदैन, इलामबाट छुर्पी, बम्बइसन र ललिपप पनि खरिद गरेर लग्नैपर्छ भन्ने मान्यता नै स्थापित भएको छ।' स्थानीय व्यापारी अमीर आचार्य भन्छन्, 'फिक्कलमा सबैभन्दा बढी चल्ने कोसेली बस्तु हो। धेरै पसल छन्, कुनै खाली हुँदैनन्।'

काठमाडौंमा व्यवसाय गरिरहेका दीपक खड्का चिनजानका कोही इलामबाट काठमाडौं आउने सूचना पाए इलामे कोसेली मगाइहाल्छन्। 'छोरीले इलामको मिठाई भनेपछि मरिहत्ते गर्छिन्', उनले भने, 'इलामको ललिपप र छुर्पी नमगाइ हुँदैन।'

दूध र चिनीको मिश्रणबाट बन्ने ललिपप र बम्बइसनले अहिले इलामको घरेलु उद्योगलाई टेवा पुगेको छ। अचेल यहाँका गाउँगाउँमा छुर्पी, ललिपप र बम्बइसन बनाइन्छ। यी मिठाई अहिले ‘इलाम ब्रान्ड’का रुपमा स्थापित हुँदै गएको सूर्योदय नगरपालिका-१० का वडाध्यक्ष पेमा उर्गेन लामाले बताए।

जिल्लामा दुई दर्जनको हाराहारीमा ललिपप उद्योग छन्। यहाँ उत्पादित मिठाइको माग स्थानीय बजारका साथै काठमाडौं र भारतलगायत अन्य मुलुकमा समेत रहेको उद्यमी शिवलाल प्रधान बताउँछन्।  

सानो एक प्याकेट ललिपपको खुद्रा मूल्य ५० र ठूलो एक सयमा बिक्री हुँदै आएको छ। उपहारका लागि कलात्मक ढङ्गले प्याकेजिङ गरिएको ‘गिफ्ट ललिपप’समेत इलामका बजारमा पाइन्छ।

इलामका १८ वटा चिज कारखानाले दैनिक २७ हजार लिटर दूध संकलन गर्दै आएका छन्। स्थानीय बजार क्षेत्रमा दैनिक पाँच हजार लिटर दूध बिक्री हुने गरेका थियो। छुर्पी बनाउने उद्योगले दैनिक १५ हजार लिटर खपत गर्ने गरेका थिए।

ललिपप, बम्बइसनजस्ता मिठाई उद्योगले पाँच हजार लिटर र भारतीय बजारमा तीन हजार लिटर दूध बिक्री हुने गरेको छ।  इलाममा १८ चिज कारखाना, एक सय ५० को हाराहारीमा छुर्पी बनाउने उद्योग र १३ वटा दुग्ध मिठाई बनाउने उद्योग रहेको सरकारी तथ्यांक छ।

इलाममा वार्षिक एक लाख १६ हजार ८६ मेट्रिक टन दूध उत्पादन हुने गरेको छ। होलिस्टिन, जर्सी गरी इलाममा ३३ हजार तीन सय ७१ वटा उन्नत जातका गाई पालिएको सरकारी तथ्यांक छ। रासस


प्रकाशित : आइतबार, फागुन २५ २०८११०:५९
प्रतिक्रिया दिनुहोस
कार्यकारी सम्पादक

केदार दाहाल

सूचना तथा प्रसारण विभाग दर्ता नम्बर

२८३८/०७८-७९

© 2025 All right reserved to biznessnews.com  | Site By : SobizTrend