काठमाडौं- दुई हप्तामै तीनपटक सर्वोच्च शिखर सगरमाथाको आरोहण गर्ने पूर्णिमा श्रेष्ठ विश्वप्रसिद्ध अमेरिकी सञ्चार संस्था ‘सीएनएन’ को ‘द एक्स्ट्रिम एथ्लेट्स हु पुस्ड लिमिट्स इन २०२४’ को सूचीमा परेकी छिन्। 

सन् २०२४ मा विश्वभरीमा उल्लेखनीय सफलता हासिल गरेका खेलाडीहरूलाई समेटिएको सूचीमा पूर्णिमा पनि परेकी हुन्। सीएनएनले पूर्णिामले दुई हप्तामा तीनपटक सगरमाथा आरोहण गरेर विश्वकीर्तिमान बनाउँदै इतिहास रचेको उल्लेख गरेको छ। सीएनएनले यो उपलब्धि केबल १३ दिनमा हासिल गरेको भन्दै फोटो पत्रकार समेत रहेकी श्रेष्ठलाई सूचीमा राखेको छ।

नेपालकी आरोही र फोटोपत्रकार पूर्णिमाले १२ मे, १९ मे र २५ मे मा सगरमाथा शिखर चढेको उल्लेख गर्दै उनलाई उद्धृत गरेर सीएनएनले लेखेको छ, 'मेरो शरीर थाकिसकेको थियो। म आफूलाई मूर्ख केटी जस्तो महसुस गरिरहेकी थिएँ। म बारम्बार हार मानेजस्तै महसुस गर्थें, हिमला चढ्नु चुनौतीपूर्ण थियो, शारीरिक थकान र यस्ता अभियानहरूमा लाग्ने ठूलो खर्चका कारण पनि। तर मैले सपना देखेँ र सफल भएँ। म मेरो सपनामा अडिग रहेँ।'

पूर्णिमा सन् २०२१ मा पासाङ ल्हामु शेर्पा अकितासँगै माउन्ट धौलागिरी चढ्ने पहिलो नेपाली महिला पनि हुन्, जुन विश्वको सातौँ अग्लो हिमाल हो।

पूर्णिमाले सीएनएनको सम्मानप्रति गौरवान्वित महसुस गरेको बताएकी छिन्। सामाजिक सञ्जालमा एक सन्देश सेयर गर्दै उनले सन् २०२४ जीवनको एक ऐतिहासिक वर्ष बन्न पुगेको बताएकी छिन्।

पूर्णिमाले… चढिन् हिमाल चुचुरा