तनहुँ- यहाँको देवघाट गाउँपालिका-५ स्थित घिनटार-टाउनचोक-देवपुर सडक कालोपत्र सुरु भएको छ। लामो समयदेखि रोकिएको कालोपत्रको काम गत शनिबारदेखि पुनः सुरु भएको हो।

निर्माण सम्पन्न गर्ने अवधि सकिएको लामो समयपछि कालोपत्र सुरु गरिएको देवघाट गाउँपालिकाका इञ्जिनीयर तीर्थ ढुंगानाले जानकारी दिए। काम छाडेर निर्माण व्यवसायी सम्पर्कमा नआएपछि गाउँपालिकाले समयमै सम्पन्न गर्न ताकेता गरेको थियो।

उक्त सडक स्तरोन्नति तथा कालोपत्र गर्न जीएमआर कन्ट्रक्सन प्रालि चितवनले विसं २०७९ पुस १७ गते ठेक्का सम्झौता गरेको थियो। प्रदेश सरकार र गाउँपालिकाको साझेदारीमा उक्त योजनाका लागि बजेट विनियोजन भएको थियो।

एक हजार पाँचसय मिटर लम्बाइ र नालीसहित ११ मिटर चौडाइको उक्त सडक विसं २०८० पुस २१ गतेसम्म सम्पन्न गर्ने गरी भ्याटसहित तीन करोड ७१ लाख ११ हजार दुईसय २५ रूपैयाँमा ठेक्का लागेको थियो। रासस