दमौली- गण्डकी प्रदेश सरकारको बजेटमा निर्माण सुरू गरिएका तनहुँका तीन सडक समस्याग्रस्त सूचीमा परेको छ। भौतिक पूर्वाधार तथा यातायात मन्त्रालयको बजेटबाट सुरू गरिएका जिल्लाका तीन सडकलाई पूर्वाधार विकास कार्यालयले समस्याग्रस्त आयोजनाका रूपमा सूचीकृत गरेको हो। 

आँबुखैरेनी-छिम्केश्वरी सडक, दुलेगौडा-हर्कपुर सडक र भानुमार्ग-चन्द्रावती पिलिगार्ग, कुन्छा-कालीमाटी सडकलाई समस्याग्रस्त आयोजनाका रूपमा राखिएको पूर्वाधार विकास कार्यालयका प्रमुख रवीन्द्र तिवारीले जानकारी दिए। निर्माण सुरू भएर लामो समयसम्म अलपत्र परेका ती सडक आयोजनालाई समस्याग्रस्त आयोजनाका रूपमा सूचीकृत गरिएको उनले बताए। उनले भने, 'ती सडक योजना समयमै सम्पन्न भएनन्। त्यहीकारण यसलाई समस्याग्रस्त आयोजनाका रूपमा राखी निर्माण सम्पन्न गराउन लागिपरेका छाैँ। सम्बन्धित निर्माण व्यवसायीलाई ताकेता गरेका छौँ।'

आँबुखैरेनी-छिम्केश्वरी सडकको १६ किलोमिटर कालोपत्रको काम २०७६ साल मङ्सिर ६ गतेदेखि सुरू भएको थियो। उक्त सडकको म्याद २०८१ साल असोज २० गते सकिएको छ। उक्त खण्डमा हालसम्म आठ किलोमिटर कालोपत्र सकिएको छभने बाँकी काम हुनसकेको छैन। 

५१ करोड ८४ लाख ९० हजार छ सय ९० रुपैयाँ लागत अनुमान गरिएको उक्त सडकको ठेक्का ३६ करोड पाँच लाख ५० हजार पाँच सय १५ मा लागेको थियो। सडक स्तरोन्नतिको ठेक्का एमएस शर्मा काष्ठमण्डप जेभीले पाएको थियो। प्रमुख तिवारीका अनुसार निर्माण व्यवसायीलाई हालसम्म ३० करोड दुई लाख एक हजार आठ सय ६२ भुक्तानी भएको छ भने छ करोड तीन लाख ४८ हजार छ सय ५२ रुपैयाँ भुक्तानी बाँकी छ। चालु आर्थिक वर्षमा सडकका लागि क करोड ५० लाख विनियोजन भएको छ। 

त्यस्तै भानुमार्ग चन्द्रावती पिलिगार्ग कुन्छा कालीमाटी सडकको स्तरोन्नति २०७६ साल कात्तिक ४ गते सुरू भएको थियो। उक्त सडकको म्याद २०७९ साल असार ३० गते सकिएर २०८२ असार १३ गतेसम्मका लागि म्याद थप भएको तिवारीले बताए। दश दशमलव १२ किलोमिटर खण्ड स्तरोन्नतिमध्ये आठ किलोमिटरमा मात्रै प्रगति भएको छ। उक्त खण्ड स्तरोन्नतिका लागि ३ करोड दुई लाख ८० हजार छ सय ६१ मा सम्झौता भएको थियो। उक्त सडक स्तरोन्नतिको काम एमएस शंकरमाली निर्माण सेवाले पाएको छ। 

तिवारीका अनुसार हालसम्म छ करोड ९५ लाख २६ हजार छ सय ४० भुक्तानी भएको छ। चालु आर्थिक वर्षमा दुई करोड बजेट विनियोजन भएको तिवारीले जानकारी दिए। यस्तै एमएस शंकरमाली निर्माण सेवाले नै ठेक्का पाएको दुलेगौडा-हर्कपुर सडकको काम पनि अलपत्र छ।

उक्त सडक स्तरोन्नतिका लागि २०७६ साल कात्तिक ४ गते सम्झौता भएको थियो। सडक निर्माणको म्याद २०७९ साल असार ३० गते सकिएर २०८२ असार १३ गतेसम्मका लागि म्याद थप भएको छ। उक्त सडकमा हालसम्म १० करोड ५८ लाख ८४ हजार पाँच सय नौ भुक्तानी भएको र चालु आर्थिक वर्षका लागि दुई करोड विनियोजन भएको प्रमुख तिवारीले जानकारी दिए। 

शुक्लागण्डकी नगरपालिका, म्याग्दे गाउँपालिका हुँदै व्यास नगरपालिकासँग जोडिने उक्त खण्डको दूरी २३ किलोमिटर छ। पहिलो चरणमा १० किलोमिटर सडक कालोपत्रका लागि ठेक्का सम्झौता भएको थियो। ट्रयाक खुलेको २४ वर्षपछि कालोपत्र सुरू हुँदा स्थानीयवासी खुसी भएका थिए। तर कामको प्रगति नबढ्दा स्थानीयवासी चिन्तित छन्। रासस