काठमाडौं- वैदेशिक रोजगारमा आकर्षक तलबको प्रलोभनमा पारी विभिन्न देश पठाइदिन्छु भन्दै रकम ठगी गरेको अभियोगमा ३ जनालाई प्रहरीले पक्राउ गरेको छ।

पक्राउ पर्नेहरूमा काठमाडौंको कागेश्वरी मनोहरा बस्ने धनुषा मिथिलाका ४१ वर्षीय रविन कोइराला, धादिङ घर भइ काठमाडौंको नयाँबजार बस्ने ३६ वर्षीय पदम बहादुर भुजेल र काठमाडौं नै बस्ने झापाका ४१ वर्षीय कार्त्तिक लाल राजवंशी रहेका छन्। 

पक्राउमध्ये रविनले अष्ट्रेलिया पठाइदिन्छु भन्दै १ जना पीडितबाट १ लाख रूपैयाँ, पदमले सर्बिया पठाइदिन्छु भन्दै १ जना पीडितबाट ३ लाख रूपैयाँ ठगी गरेको प्रहरीले जनाएको छ। यस्तै पक्राउ परेका कार्त्तिकले अल्बानिया पठाइदिन्छु भन्दै १ जना पीडितबाट ७ लाख ७० हजार रूपैयाँ लिएको प्रहरीको भनाइ छ।

पीडितको उजुरीका आधारमा सोमबार प्रहरीले उनीहरुलाई काठमाडौंबाट पक्राउ गरेको हो। उनीहरूलाई आवश्यक अनुसन्धान तथा कारबाहीको लागि वैदेशिक रोजगार विभाग ताहाचल पठाइएको प्रहरीले जनाएको छ।