काठमाडौं- स्थानीय तहको वाणिज्य बैंकका शाखामा रहेको सञ्चित कोषको ८० प्रतिशत रकमलाई बैंकमा निक्षेपको रुपमा गणना हुन थालेपछि तरलताको समस्या समाधान उन्मुख देखिएको छ। 

जसका कारण बैंकहरूको सीडी रेसियो ९० प्रतिशतभन्दा तल आएको नेपाल बैंकर्स संघका अध्यक्ष अनिल उपाध्ययले जानकारी दिए। 

यसअघि स्थानीय तहको कोषमा रहेको रकमको ५० प्रतिशत रकमलाई मात्रै निक्षेपमा गणना गर्न पाउने व्यवस्था रहेको थियो। तरलतामा लगातार समस्या आएपछि राष्ट्र बैंकले गत सोमबार मात्रै त्यसलाई ८० प्रतिशत पुर्‍याएको थियो। निर्णयकै भोलिपल्ट मंगलबार बैंकिङ प्रणालीमा एकैपटक ३० अर्ब रुपैयाँ निक्षेप बढेको हो। 

अहिले बैंकिङ प्रणालीमा ४८ खर्ब ४६ अर्ब रुपैयाँ निक्षेप पुगेको छ। ऋण विस्तार भने १ अर्ब रुपैयाँले वृद्धि भएर ४६ खर्ब १९ अर्ब रुपैयाँ पुगेको छ।

स्थानीय तहको कोषको पैसालाई निक्षेपमा गणना गरेका कारण ३० अर्ब रुपैयाँ निक्षेप बढी देखिएको र सीडी रेसियो पनि ९० प्रतिशतभन्दा तल आएकोसमेत अध्यक्ष उपाध्ययले जानकारी दिए।