काठमाडौं- अवैध रुपमा भन्सार छलेर लैजान लागेको सुनलगायतका सामग्रीसहित त्रिभुवन अन्तर्राष्ट्रिय विमानस्थलबाट दुईजना पक्राउ परेका छन्।
पक्राउ पर्नेहरूमा पाँचथरका ३२ वर्षीय दिलु सुब्बा र सिन्धुली घर भइ काठमाडौं बस्ने ३९ वर्षीय भविमान ठोकर रहेका छन्।
दुबईबाट काठमाडौं आएका दिलुलाई भन्सार छली गर्न लगाइ भविमानले संकलन गरी लैजान लागेको अवस्थामा विमानस्थलको अन्तर्राष्ट्रिय उडानतर्फको आगमन पार्किङ एरियाबाट प्रहरीले दुवै जनालाई पक्राउ गरेको हो।
अन्दाजी २५ ग्रामको सुनको सिक्री एक थान, आइफोन १३ प्रो म्याक्स १ थान, रेडमी मोबाइल ३ थान, डेल ल्यापटप २ थान र १ थान एयरपोड प्रो ४ सहित २ जनालाई सोमबार दिउँसो पक्राउ गरिएको प्रहरीले जनाएको छ।
उनीहरूलाई आवश्यक अनुसन्धान तथा कारबाहीका विमानस्थल भन्सार कार्यालय गौचरमा बुझाइएको प्रहरीले जनाएको छ।
