दाङ- तुलसीपुर उपमहानगरपालिका-२ र दंगीशरण गाउँपालिका-६ जोड्ने खड्गपुर पोटली झोलुंगे पुल निर्माण सुरु भएको छ।

संघीय सरकारको विनियोजित बजेट ९७ लाख ४८ हजार रूपैयाँ लागतमा सो पुल निर्माण सुरु गरिएको दंगीशरण गाउँपालिकाका-६ का वडाध्यक्ष रोशनजंग शाहले जानकारी दिए।

उनका अनुसार सो पुल एक सय २० मिटर लम्बाइको हुनेछ। पुल निर्माणपछि त्यहाँका दुई १३ घरधुरीका एक हजार दुई सय ७८ जना प्रत्यक्ष लाभान्वित हुने वडाध्यक्ष शाहले बताए।

यही जेठ २१ मा सम्झौता भएको पुलको सामाजिक तथा प्राविधिक सहयोग सेवा प्रतिष्ठान नेपाल तुलसीपुर दाङले गर्नेछ भने पुलको निर्माण २०८२ जेठ २० सम्म पूरा गर्ने लक्ष्य लिइएको छ। 

सो पुलको सोमबार दंगीशरण गाउँपालिकाका अध्यक्ष शम्भु गिरीले शिलान्यास गरे। अध्यक्ष गिरीले अन्तरपालिकाका दुई वटा वडालाई जोड्ने पुल निर्माणले त्यहाँका नागरिकलाई सहरसम्मको पहुँचमा सहज हुने बताए।

त्यस अवसरमा गाउँपालिका उपाध्यक्ष पिमा वली खड्काले तोकिएको समयमा पुल निर्माण सम्पन्न हुनेमा विश्वास व्यक्त गरे। रासस