अछाम- कर्णाली नदीमा रहेको झोलुंगे पुलको जाली लत्रिँदा बीच भागमै अड्किएका ११ खच्चडको जीवितै उद्धार गरिएको छ। दुई खच्चडको भने मृत्यु भएको छ।

अछामको पञ्चदेवल बिनायक नगरपालिका-९ कालेकाडा र दैलेखको आठबिस नगरपालिका-६ खिड्कीजिउला जोडने झोलुंगे पुलको जाली लत्रिएपछि आज बिहानदेखि १३ खच्चड पुलको बीच भागमा अड्किएका थिए।

खच्चडलाई पुलको जाली काटेर कर्णालीमा खसाली उद्धार गरिएको अछामका प्रहरी नायव उपरीक्षक सन्तोष पाठकले जानकारी दिए। 'पुलको जाली काटेर उद्धार गर्ने क्रममा दुई खच्चडको मृत्यु भएको हो', उनले भने, 'बाँकीको डुंगाको सहायताले जीवितै उद्धार गर्न सफल भयौँ।'

पुलको दाहिनेतर्फको जाली लत्रिएको थियो। खुट्टा जालीभित्र पसेपछि खच्चड पुलमा अड्किएका थिए।

पुलको दाहिनेतर्फको भाग पुरै बांगो भएको छ।

उद्धारमा अछामस्थित नेपाली सेनाको गोरख बक्स गणको टोली, नेपाल प्रहरी, सशस्त्र प्रहरी बल तथा स्थानीयवासी खटिएका थिए। रासस