काठमाडौं- नेपाल उद्योग वाणिज्य महासंघका अध्यक्ष चन्द्रप्रसाद ढकालले सरकारले ल्याएको बजेटका कार्यक्रम सकारात्मक भएको प्रतिक्रिया दिएका छन्।
अर्थमन्त्री वर्षमान पुनले आज ल्याएको बजेटले लिएका कार्यक्रमले लगानी प्रबर्द्धन र रोजगारी सिर्जनार्तफ केन्द्रीत भएको उनको भनाइ छ।
नेपाल उद्योग वाणिज्य महासंघले २०८० असोज २५ गते विद्यमान आर्थिक समस्या समाधान र नयाँ चरणको सुधारका लागि उच्चस्तरीय आयोगको माग गरेअनुसार बजेटमा पनि घोषणा भएको उनले बताए।
महासंघले प्रवर्द्धन गरेको सानो बचत बाट लगानी कम्पनी खोल्ने र विभिन्न क्षेत्रमा लगानी गर्ने कम्पनी लाई प्रवर्द्धन गर्ने, कृषिमा करार खेती र पहाडमा फलफूल खेतीको विषय आएको उनले बताए।
पर्यटनमा वैवाहिक पर्यटन माइस पर्यटन हिल स्टेसन विकास गर्ने विषय, सूचना प्रविधि क्षेत्रका लागि लिइएको नीति राम्रो भएको उनको भनाइ छ।
बजेटको कार्यक्रम कार्यान्वयन भएमा ६ प्रतिशतको आर्थिक वृद्धि सहजै भेटिने उनको भनाइ छ। राजस्व नीतिका बारेमा आर्थिक विधेयक पढेपछि महासंघले धारणा दिने उनको भनाइ छ।
