काठमाडौं- सरकारले सूचना प्रविधिलाई अर्थतन्त्रको संवाहकका रुपमा अघि बढाउने घोषणा गरेको छ। आगामी आर्थिक वर्षको बजेटमार्फत् सरकारले सूचना प्रविधिलाई अर्थतन्त्रको खम्बाका रुपमा अघि बढाउने भएको हो। 

अर्थमन्त्री वर्षमान पुनले आज सार्वजनिक गरिरहेको बजेटमा सूचना प्रविधिबाट आगामी १० वर्षमा ३० खर्बको निर्यात गर्ने र ५ लाखलाई प्रत्यक्ष रोजगारी दिलाउने उल्लेख गरिएको छ। यसका लागि नीतिगत तथा वित्तीय उत्प्रेरणाका कार्यक्रम सञ्चालन गरिने मन्त्री पुनले घोषणा गरेका छन्। 

सूचना प्रविधिका लागि आवश्यक पूर्वाधारका लागि काठमाडौं तथा बुटवलमा सूचना प्रविधि पार्क बनाउने सरकारले घोषणा गरेको छ। यसका लागि तत्कालका लागि अहिलेकै घर लिएर आवश्यक पूर्वाधारको व्यवस्था गरी सञ्चालन गरिने उल्लेख छ। यस्ता पार्कमा वर्क स्टेशन सञ्चालनका लागि तीन वर्षसम्म नि:शुल्क हुने छ।

सरकारले काठमाडौंको चारखालमा बहुतले भवन तथा खुमलटारमा ज्ञानपार्क निर्माण गर्ने सरकारले घोषणा गरेको छ। 

सूचना प्रविधिको विकासका लागि सरकारले आवश्यक कानूनी तथा संस्थागत व्यवस्था गर्ने घोषणा पनि गरेको छ। गुणस्तरीय इन्टरनेट तथा सर्वव्यापी पहुँचका लागि कार्यक्रम अघि बढाउने सरकारले घोषणा गरेको छ।