काठमाडौं- आकर्षक तलबमा वैदेशिक रोजगारीका लागि विभिन्न देश पठाइदिने भन्दै रकम ठगी गर्ने ३ जना पक्राउ परेका छन्।

ठगी अभियोगमा ललितपुर बस्ने कैलालीका ३६ वर्षीय विशाल हमाल, काठमाडौं बस्ने ३१ वर्षीय प्रशान्त पण्डित र सप्तरीका ४५ वर्षीय सैलेश कुमार झालाई पक्राउ गरिएको प्रहरीले जनाएको छ।

पक्राउ परेकामध्ये विशालले अमेरिका पठाइदिन्छु भन्दै २ जना पीडितहरूबाट १६ लाख ७० हजार रूपैयाँ ठगी गरेका थिए भने प्रशान्तले अष्ट्रेलिया पठाइदिन्छु भन्दै १ जना पीडितबाट ८ लाख र सैलेशले यूके पठाइदिन्छु भन्दै १ जना पीडितबाट ५ लाख ४० हजार रूपैयाँ ठगी गरेको प्रहरी अनुसन्धानमा खुलेको छ।

काठमाडौंका विभिन्न स्थानबाट पक्राउ परेका उनीहरूलाई थप अनुसन्धान तथा कारबाहीका लागि वैदेशिक रोजगार विभाग ताहाचल काठमाडौं पठाइएको प्रहरीले जनाएको छ।