काठमाडौं- भौतिक पूर्वाधार तथा यातायातमन्त्री रघुवीर महासेठले प्रधानमन्त्री तथा मन्त्रिपरिषदको कार्यालयमा बुझाएको सम्पत्ति विवरणअनुसार देशका विभिन्न ठाउँमा घरजग्गा रहेको छ।
जनकपुर, ललितपुर र सिन्धुलीमा उनको जग्गा रहेको छ। महासेठले अधिकांश जग्गा श्रीमती जुलीकुमारी महतोको नाममा रहेको उल्लेख गरेका छन्। जनकपुर र ललितपुरमा उनकै नाममा घर रहेको छ।
ललिपुर-२५ मा महासेठको २ रोपनी जग्गामा साढे दुई तले घर रहेको छ। त्यस्तै ललितपुरमै १ रोपनी जग्गा रहेको छ।
त्यस्तै महासेठले २ करोड २५ लाख रुपैयाँ नगद रहेको उल्लेख गरेका छन्। ललितपुरको सैँबुमा रहेको जग्गा बिक्री र पैतृक जग्गामा हुने खेतीको आम्दानीबाट उक्त रकम आएको उनले उल्लेख गरेका छन्।
यसैगरी मन्त्री महासेठसँग ४३ तोला सुन, साढे १ किलो चाँदी, ७ थान औँठी, ३ थान सिक्रीलगायतका गहना रहेका छन्।
त्यस्तै जुलीकुमारी महतोको नाममै गुडविल फाइनान्सको ५ लाखको सेयर, महिला लघुवित्तको १ करोडको सेयर र कर्पोरेट बैंकको २ करोड ५० लाखको सेयर रहेको उल्लेख छ।
