काठमाडौं- नेपाल उद्योग वाणिज्य महासंघले सरकारलाई आगामी आर्थिक वर्षको बजेटको आकार धेरै नबढाउन सुझाव दिएको छ। 

बजेटका सम्बन्धमा अर्थमन्त्रीसँगको अन्तरक्रिया कार्यक्रममा महासंघका अध्यक्ष चन्द्र ढकालले बजेटको आकार धेरै नबढाउन सुझाव दिएका हुन्। 

स्रोतको समस्या भइरहेको समयमा सरकारले ठूलो बजेट ल्याउँदा आन्तरिक ऋण बढ्ने र जसले गर्दा निजी पुँजीमा संकुचन आउने उनको भनाइ छ। 

तुलनात्मक रुपमा किफायति र धेरै प्रतिफल दिने निजी क्षेत्रलाई समस्या सिर्जना हुनेगरी बजेट नबढाउन ढकालले आग्रह गरेका हुन्। 

मन्त्रीसँगको अन्तरक्रियामा महासंघले लिखित सुझाव दिएको छ। त्यस्तै सदस्यहरूले पनि सुझाव दिएका छन्। 

लगानीको वातावरण बनाउनका लागि नीतिगत सुधार, कर तथा राजस्व नीतिमा परिमार्जन गर्न महासंघले सुझाव दिएको छ। 

गुणस्तरीय सार्वजनिक खर्च बढाउनका लागि सरकारले विशेष पहल गर्नुपर्ने महासंघले सुझाव दिएको छ।