काठमाडौं- पोखराको गैह्रापाटनस्थित प्राइम सहकारी ठगी प्रकरणमा ८ जना पक्राउ परेका छन्।

सहकारी ठगीको आरोपमा प्रहरीले पोखरा बस्ने संस्थाका पूर्वअध्यक्ष ६६ वर्षीय निदेश प्रसाद कोइराला, अध्यक्ष ४३ वर्षीय शंकर कार्की, व्यवस्थापक ३६ वर्षीया निरू थापा केसी, कर्मचारी प्रमुख ३७ वर्षीय सुरेन्द्र मणी पौडेललाई पक्राउ गरेको हो।

यस्तै कानूनी सल्लाहकार ५३ वर्षीय ईन्द्रप्रसाद बराल, पूर्वकोषाध्यक्ष ५२ वर्षीय कुलदिप भट्टराई, कर्जा अधिकृत ३० वर्षीय सुनिल थापा र सेयर सदस्य एवम् सल्लाहकार ६९ वर्षीय मान बहादुर गुरूङ पक्राउ परेका छन्।

उक्त सहकारी संस्थाका सञ्चालक समितिका पदाधिकारीहरूले कुल बिगो १ अर्ब ५४ करोड १५ लाख रकम अपचलन तथा हिनामिना गरेको भन्ने उजुरी परेपछि प्रहरीले उनीहरुलाई पक्राउ गरी अनुसन्धान अघि बढाएको हो।

यस सम्बन्धमा थप अनुसन्धान भइरहेको प्रहरीले जनाएको छ।