काठमाडौं- आगामी आर्थिक वर्ष २०८१/८२ को वार्षिक नीति तथा कार्यक्रममा राष्ट्रपति रामचन्द्र पौडेलको अनुरोधमा दुई योजना परेका छन्। राष्ट्रपतिको अनुरोधमा दुई कार्यक्रमले नीति तथा कार्यक्रममा स्थान पाएको हो।
जसमा आदिकवि भानुभक्तको जन्मस्थल चुँदी रम्घामा सबै नेपाली भाषाभाषीका मूर्धन्य स्रष्टाहरूको प्रतिमा र सप्तधामसहितको भानु साहित्य उद्यान निर्माण कार्यलाई तीव्रता दिइने उल्लेख छ।
यस्तै जलवायु परिवर्तनका नकारात्मक असर न्यून गर्दै अनुकूलन क्षमता वृद्धि गरी उत्थानशीलता हासिल गरिने विषयसमेत राष्ट्रपतिको अनुरोधमा नीति तथा कार्यक्रममा परेको हो। जसमा उच्च हिमशृङ्खला र नदी प्रणालीलाई जीवन्त राख्दै हिमाल, पहाड र तराई क्षेत्रमा जलवायु परिवर्तनबाट परेका असरलाई एकीकृत र सन्तुलित रूपमा सम्बोधन गर्न 'राष्ट्रपति जलवायु परिवर्तन व्यवस्थापन कार्यक्रम' सञ्चालन गरिने उल्लेख छ।
मंगलबार राष्ट्रपति पौडेलले संघीय संसद्का दुवै सदनको संयुक्त बैठकमा वार्षिक नीति तथा कार्यक्रम प्रस्तुत गरेका थिए।
