काठमाडौं- नेपाली कांग्रेसले सरकारको नीति तथा कार्यक्रम संघीय संसदमा पेस गर्न दिने भएको छ।

संसदमा अवरोध गर्दै आएको कांग्रेसले राष्ट्रपति रामचन्द्र पौडेललाई आज संसदमा नीति तथा कार्यक्रम पेश दिने निर्णय गरेको हो। आज बिहान बसेको संसदीय  दल कार्यसमिति बैठकले  बैठकले सो निर्णय गरेको हो।

नीति तथा कार्यक्रम प्रस्तुत गर्न दिने तर त्यसमाथिको छलफल गर्न भने नदिने कांग्रेसले जनाएको छ।

आज दिउँसो तीन बजे बस्ने संघीय संसदको बैठकमा राष्ट्रपति पौडेलले सरकारको नीति तथा कार्यक्रम प्रस्तुत गर्दैछन्।

प्रधानमन्त्री पुष्पकमल दाहाल ‘प्रचन्ड’ ले नीति तथा कार्यक्रम पेश गर्न दिन आग्रह गरेका थिए। प्रधानमन्त्री निवास बालुवाटारमा कांग्रेस नेतासँगको छलफलमा सहकारीको समस्या समाधान गर्न आफू सधै तयार रहेकोले नीति तथा कार्यक्रम पेश गर्न दिन आग्रह गरेका थिए। 

यता सभामुख देवराज घिमिरेले १२:३० बजे प्रमुख राजनीतिक दलका प्रमुख सचेतक र सचेतकसँग परामर्श गर्दै छन् भने १ बजे कार्यव्यवस्था परामर्श समितिको बैठक बोलाएका छन्। संसद् सचिवालयले सुरक्षा प्रबन्धलगायत साजसज्जाको तयारी पूरा गरेको जनाएको छ।

सरकारको वार्षिक बजेट अघि सङ्घीय संसद्का दुवै सदनमा वार्षिक नीति तथा कार्यक्रम प्रस्तुत गर्ने परम्परा छ। मन्त्रिपरिषद्को सिफारिसमा नेपालको संविधानको धारा, ९५ बमोजिम दुवै सदनको संयक्त बैठकमा नीति तथा कार्यक्रम प्रस्तुत हुने कार्यक्रम निर्धारण भएको कार्यसूची पनि संसद् सचिवालयले सार्वजनिक गरिसकेको छ।