काठमाडौं- चालु आर्थिक वर्षको तेस्रो त्रैमाससम्म नेपाल टेलिकमको कूल आम्दानी गत वर्षको तुलनामा घटेको छ। कम्पनीले सार्वजनिक गरेको लेखापरीक्षण नगरिएको वित्तीय विवरण अनुसार नौ महिनामा गत वर्षको तुलनामा ६ प्रतिशतले आम्दानी घटेको छ। 

कम्पनीले चालु वर्षको साउनदेखि चैतसम्म ३१ अर्ब २० करोड रुपैयाँ आम्दानी गरेको छ। यसमा सञ्चालन आम्दानी भने २५ अर्ब रहेको छ। ५ अर्ब २० करोड ब्याज आम्दानी गरेको छ। गत वर्षको यही अवधीमा कम्पनीले ३३ अर्ब २० करोड आम्दानी गरेको छ। 

गत वर्षको तुलनामा ब्याजदर घट्दा कम्पनी ब्याज आम्दानीमात्र ५० करोड घटेको छ। त्यस्तै सञ्चालन आम्दानी पनि गत वर्षको तुलनामा घटेको छ। 

सञ्चालन आय तथा कूल आम्दानी घटेपनि चालु वर्षको नौ महिनामा कम्पनीको खुद नाफा भने बढेको छ। कम्पनीले यो अवधिमा ५ अर्ब ५९ करोड रुपैयाँ नाफा गरेको छ। यो गत वर्षको तुलनामा ३.३६ प्रतिशतले धेरै हो। 

कम्पनीको प्रति शेयर आम्दानी भने ४१.४४ रुपैयाँ रहेको छ।