काभ्रेपलाञ्चोक- खानेपानीको चरम अभाव झेलिरहेको मण्डनदेउपुर नगरको घरघरमा अबको केही महिनाभित्र इन्द्रावती नदीको पानी पुर्‍याइँदैछ।

करिब दुई दशकअघि ‘अविरल बग्दछ इन्द्रावती’ नामक टेलिशृङ्खला हेरेका काभ्रेपलाञ्चोकको मण्डनदेउपुरका पाँच हजार पाँच सयभन्दा बढी स्थानीयका घरघरमा सोही नदीको पानी पाइपबाट ‘अविरल’ खानेपानीका रूपमा आउँदो साउन महिनामा घरघरमा पुर्‍याइने भएको हो।

टेलिसिरियलमार्फत चर्चित बनाइएको आफ्नै भूमि छोएर बग्ने उक्त इन्द्रावती नदीको पानी मण्डनदेउपुर नगरका पाँच हजारभन्दा बढीको ‘जिन्दगानी’ बन्दैछ। लिफ्टिङ प्रविधिमार्फत नगरका पाँच हजारभन्दा बढी परिवारका लागि विभिन्न चरणमा खानेपानी उपलब्ध गराउन लागिएको हो।

विसं २०७८ असारमा बृहत् खानेपानी आयोजनाको प्रशासनिक प्रक्रिया थालेलगत्तै पहिलो चरणमा ५४ करोड रूपैयाँको ठेक्का आह्वान गर्दै सोही वर्षको साउनदेखि निर्माणको काम सुरु गरिएको थियो। आयोजनाको हाल करिब ८० प्रतिशत काम सकिएको मण्डनदेउपुर सुक्खा क्षेत्र बृहत् खानेपानी उपभोक्ता समितिका अध्यक्ष रामबहादुर लामाले बताए।

नगरको १२ वडामध्ये खानेपानीको समस्या झेलिरहेको नौवटा वडाका लागि आयोजना सञ्चालन गर्न लागिएको हो। विसं २०७७ चैतमा उक्त खानेपानी आयोजनाका लागि सरकारीस्तरबाट एक अर्ब रूपैयाँ स्वीकृत गरिएको थियो। स्वीकृत बजेटमध्ये करिब आधा बजेट आयोजनाको प्रारम्भिक ठेक्का सम्झौता गरिएको थियो।

'आयोजनाको भौतिक काम तीव्र रूपमा भइरहेको छ, निर्धारित समयमै सम्पन्न हुने देखिएको छ, साउन महिनाभित्र स्थानीयका घरघरमा खानेपानी पुग्दैछ', अध्यक्ष तामाङले भने।

लामाका अनुसार आयोजना तीन वर्षमा सक्ने समयसीमा हो। शर्मा-लामा-रमण जेभी निर्माण कम्पनीले आयोजनाको निर्माण गरिरहेको छ। आयोजनाका लागि नेपाल सरकार खानेपानी तथा ढल व्यवस्थापन विभागको ९६ करोड रूपैयाँ, स्थानीय उपभोक्ताबाट संकलित तथा नगरको लगानीसहित एक अर्ब रूपैयाँको आयोजना स्वीकृत गरिएको हो।

उपभोक्ता समितिले आयोजनाका लागि स्थानीयसँग प्रतिउपभोक्ता एक हजार रूपैयाँ संकलन गरिएको थियो। मण्डनदेउपुर नगरपालिकासँग खानेपानी आयोजनाका लागि एक प्रतिशत करिब एक करोड रूपैयाँ सम्झौता गरिएअनुसार ५१ लाख ६६ हजार रूपैयाँको सम्झौता भएको लामाले बताए।

मण्डनदेउपुर-१० की वृद्धा पञ्चमाया तामाङले घरमा खानेपानी आउने भएपछि निकै खुसी लागेको बताइन्। 'घरमै पानी आएपछि पँधेरो र कुवा धाउनु नपर्ने हुँदा हामी निकै खुसी भएका छौँ', उनले भनिन्। उनले यसअघि भूकम्पले नजिकको पानीको मूल सुक्दा आधा घण्टाको बाटो हिँडेर खानेपानी ल्याउनुपर्ने बाध्यता भएको बताइन्।

हाल १० नं वडास्थित थामडाँडामा निर्माण गरिएको मुख्य ट्यांकीमा इन्द्रावती नदीको नारिमखर्क र ७ नं को सोतेबाट पानी खसालिने छ। अन्य दुईवटा निर्माण हुने समवेलअन्तर्गत नारिमखर्कमा धमाधम निर्माण भइरहेको अध्यक्ष लामाले जानकारी दिए। उनका अनुसार नारिमखर्क र सोतेमा पानी प्रशोधन केन्द्र (ट्रिटमेन्ट प्लान्ट)को निर्माण अन्तिम चरणमा पुगेको छ। इन्द्रावती नदीको पानी प्रशोधन गरेर नौ सय मिटरको उचाइमा अवस्थित थामडाँडाको मुख्य ट्यांकीमा खसालिनेछ।

यस आयोजनाअन्तर्गत हाल विभिन्न स्थानमा आवश्यक ३० वटासहित २३ वटा वितरण ट्यांकी निर्माण सकिएको छ। वितरण ट्यांकी २० देखि एकसय घनमिटरसम्मका छन्। यस्तै ४० देखि दुई सय घनमिटरका पम्पिङ गर्ने सातवटा ट्यांकी निर्माण गरिएको छ। यस्तै खानेपानी आयोजनाको कार्यालय भवन निर्माण सकिएको छ। 

पानी लिफ्टिङका लागि चारवटा पानी तान्ने पम्प आएपछि बैशाख महिनाभित्र पानी परीक्षण गरिने जनाइएको छ। आयोजनाको मुख्य पाइप लाइन ३६ किलोमिटरको हुने जनाइएको छ। हाल मुख्य पाइप लाइन बिच्छ्याउने काम भइरहेको छ। वितरण पाइप लाइन एक सय ५४ किलोमिटर हुनेछ भने समग्रमा कुल एक सय ८० किलोमिटर पाइप लाइनको हुनेछ। घरघरमा धारा जडानको काम बाँकी रहेको अध्यक्ष तामाङले बताए।

आयोजनाबाट नगरको ४, ५, ६, ७, ८, ९, १०, ११ र १२ वडाका पाँच हजार पाँच सय पाँच घरधुरी लाभान्वित हुनेछन्।

प्राविधिकका अनुसार लिफ्टिङ प्रविधिमार्फत व्यवस्थित गरिने खानेपानी आयोजनाको मुख्य रिजर्ववेयर ट्यांकीमा प्रतिसेकेण्ड १३ दशमलव शून्य पाँच लिटर पानी खस्नेछ। आयोजना सम्पन्न भएपछि नौ वर्षअघिको भूकम्पले पानीका मूल सुकाएर खानेपानीको समस्या झेलिरहेका यहाँका बासिन्दा खानेपानी अभावबाट उन्मुक्ति पाउने आशामा रहेका छन्। रासस