शुक्रबार, जेठ ३२ गते २०८१    
images
images

ठेक्का रद्दको चेतावनीपछि मालढुंगा-बेनी सडक निर्माणमा तीव्रता, असारसम्म सक्ने तयारी

images
बिहीबार , चैत १ २०८०
images
images
ठेक्का रद्दको चेतावनीपछि मालढुंगा-बेनी सडक निर्माणमा तीव्रता, असारसम्म सक्ने तयारी

ठेकेदारको लापरबाही र ढिलासुस्तीका कारण अहिले मालढुंगा-बेनी सडकमा यात्रा गर्न सकस हुँदै आएको छ।

images
images

पर्वत- उत्तर-दक्षिण जोड्ने राष्ट्रिय गौरवको कालीगण्डकी करिडोर आयोजनाअन्तर्गत मालढुंगा-बेनी सडक निर्माण तीव्र गतिमा भइरहेको छ। निर्माण अवधि सकिएर पटकपटक म्याद थप गर्दासमेत कामको प्रगति नदेखिएपछि गत माघ दोस्रो साता सम्झौता रद्द गर्ने चेतावनी आयोजनाले दिएको थियो।

images
images
images

चेतावनीपछि मुख्य ठेकेदार कम्पनी नै काममा फर्किएर निर्माणलाई तीव्रता दिएको हो। सडक निर्माणको जिम्मा लिएको एपेक्स-खड्का जेभी कन्स्ट्रक्सनले काम सम्हालेको कालीगण्डकी करिडोर आयोजनाअन्तर्गत मालढुंगा-बेनी-जोमसोम-कोरला सडक आयोजना कार्यालय जोमसोमले जनाएको छ।

images

यसअघि उक्त कम्पनीले सहायक ठेकेदार कम्पनी ओमकारेश्वर कन्स्ट्रक्सनलाई जिम्मा दिएको थियो। आयोजना कार्यालय जोमसोमले गत माघ दोस्रो साता ठेकेदार कम्पनीका प्रतिनिधिसँग छलफल गरेको थियो। छलफलमा आयोजना कार्यालयले तत्काल कामको प्रगति देखिनेगरी निर्माण सुरु नगरे ठेक्का रद्द गर्ने र पुनःनयाँ टेण्डर प्रक्रियामा जाने चेतावनी दिएपछि आफूहरु काममा फर्किएको एपेक्स-खड्का जेभी कन्स्ट्रक्सनका मुख्य प्रतिनिधि हरिबहादुर खत्रीले जानकारी दिए।

images

उनका अनुसार विगत दुई सातादेखि पर्याप्त मजदुर र उपकरण राखेर गतिमा निर्माण अघि बढेको छ। सम्झौतामा ३० महिनाभित्र सडक सम्पन्न गर्नुपर्ने उल्लेख भए पनि तीन वर्षमा जम्मा ४५ प्रतिशत मात्र प्रगति भएको छ।

images
images

दोस्रो पटक थपिएको म्यादसमेत गत आर्थिक वर्षको असारमा सकिएको थियो भने पुनःतेस्रो पटक छ महिना थप गरेको समय पुस मसान्तमा सकिएको छ। पुनः असार मसान्तसम्म म्याद थप गर्ने तयारी भइरहेको आयोजनाका साइड इञ्चार्ज इञ्जिनियर अच्युतविलास पन्तले जानकारी दिए। उक्त अवधिभित्र काम सम्पन्न गर्नुपर्ने उनको भनाइ छ।

ठेक्का सम्झौतामा कालीगण्डकी नदीबाटै निर्माण सामग्री उत्खनन गर्ने उल्लेख भए पनि सर्वोच्च अदालतको आदेशका कारण सामग्री प्रयोग गर्न नपाएको भन्दै अब छिमेकी जिल्ला वा अन्य वैकल्पिक उपाय अपनाएर भए पनि सामग्री उपलब्ध गराइ निर्माणलाई तीव्रता दिने र थप भएको अवधिभित्रै निर्माणसक्ने एपेक्स-खड्का जेभी कन्स्ट्रक्सनका प्रतिनिधि खत्रीले बताए।

निर्माण सामग्रीको अभाव देखाएर सहायक ठेकेदारले योजना अलपत्र पार्दै आएको भन्दै अब भने तोकिएकै मितिमा काम सम्पन्न गर्ने उनको भनाइ छ।

राष्ट्रिय गौरवको कालीगण्डकी करिडोर आयोजनाअन्तर्गत बेनी-जोमसोम-कोरला सडक आयोजनामार्फत १३ किमी दुरीको मालढुंगा-बेनी सडक स्तरोन्नतिका लागि विसं २०७७ चैतमा एपेक्स-खड्का-कृष्ण जेभीले ५२ करोड ८६ लाख रूपैयाँमा ठेक्का सम्झौता गरेको थियो। पहिले कालोपत्रसहित करिब छ मिटरको हाराहारीमा रहेको सडकलाई नौ मिटर फराकिलो बनाएर एक मिटरको नाली र दुई लेनमा आठ मिटर चौडाइका दरले कालोपत्र गरिने आयोजनाले जनाएको छ।

ठेकेदारको लापरबाही र ढिलासुस्तीका कारण अहिले मालढुंगा-बेनी सडकमा यात्रा गर्न सकस हुँदै आएको छ। हिउँदमा धुलो र बर्सातमा हिलाम्मे सडकमा यात्रा गर्न नागरिक बाध्य भएका छन्। म्याग्दी र मुस्ताङ तथा पर्वतकै जलजला क्षेत्रमा सञ्चालन हुने दैनिक सयौँको सङ्ख्याका सवारीले उडाएको धुलो बस्तीसम्म पुग्दा स्थानीयवासीको जीवनयापनसमेत कष्टकर भएको छ। सडकमा गुडेका सवारीसाधनले उडाएको धुलो बस्तीमा पुग्दा सर्वसाधारणको स्वास्थ्यमा असर पुगेको जलजला गाउँपालिकाका उपाध्यक्ष दीपक आचार्यले बताए।

सडक खण्डअन्तर्गत पर्ने पर्वतको खनियाघाट, फर्से, लस्ती, मिलनचोक र लामाखेतका स्थानीयले सडक निर्माण अलपत्र पर्दा धुलो र हिलोको समस्या भोग्नुपरेको गुनासो गरेका छन्।

बेनी-जोमसोम-कोरला सडक आयोजनाका सूचना अधिकारी विष्णु चापागाईँले मालढुंगामा पहाड काटेर सडक विस्तार गर्न सवारी आवतजावत बन्द गरेरै निर्माणलाई तीव्रता दिएको बताए। फागुन ९ गतेदेखि दैनिक चार घण्टा बन्द गरेर निर्माण थालिएको हो। अब कटानको काम करिब सकिएको र अन्य काम भइरहेको उनको भनाइ छ।

विसं २०४८ मा ‘कामका लागि खाद्यान्न’ कार्यक्रमअन्तर्गत सुरु गरेर विसं २०५२ मा मार्ग खुलेको र २०६८ मा कालोपत्र भएको मालढुंगा-बेनी सडक पछिल्लो समय जीर्ण अवस्थामा थियो। रासस


प्रकाशित : बिहीबार , चैत १ २०८००१:४१

प्रतिक्रिया दिनुहोस
कार्यकारी सम्पादक

केदार दाहाल

सूचना तथा प्रसारण विभाग दर्ता नम्बर

२८३८/०७८-७९

© 2024 All right reserved to biznessnews.com  | Site By : SobizTrend