काठमाडौं- जनकपुर भन्सार कार्यालयले विभिन्न ब्रान्डका १ सय ८५ वटा मोटरसाइकल लिलाम बिक्रीका लागि सूचना निकालेको छ। चोरी पैठारी गरेर ल्याइएका त्यस्ता मोटरसाइकल भन्सारले लिलामीमार्फत बिक्री गर्दै आएको छ। 

जनकपुर भन्सारले भन्सार नियमावली २०६४ को नियम ३५(१) बमोजिम विभिन्न सवारीसाधनहरुको सिलबन्दी लिलाम बिक्रीका लागि बुधबार सूचना जारी गरेको हो। 

भन्सारले निकालेको लिलाम सूचनामा ६१ वटा पुनः दर्ता गर्न सकिने मोटरसाइकल तथा स्कुटर छन् भने १ सय २४ वटा पुनः दर्ता गर्न नसकिने खालका रहेका छन्। पुन: दर्ता गर्न नसकिने मोटरसाइकल पत्रु गर्नुपर्ने छ। पत्रु गर्नुपर्ने १ सय २४ मोटरसाइकलका लागि न्यूनतम मूल्य ७ लाख ५० हजार ५ सय ५० रुपैयाँ तोकिएको छ। 

त्यस्तै अन्य मोटरसाइकलको भने हरेकको छुट्टाछुट्टै मूल्य कायम गरेर लिलामी गर्न लागिएको छ। लिलाम बिक्रीका लागि जारी भएको सूचनाअनुसार न्यूनतम १२ हजार ५ सय रुपैयाँदेखि ५५ हजार रुपैयाँसम्मका मोटरसाइकल उपलब्ध हुनेछ। 

लिलामीमा होन्डा, टीभीएस, हिरो, यामाहादेखि रोयल इनफिल्डसम्मका मोटरसाइकल तथा स्कुटर छन्। 

लिलामी लिन चाहने व्यक्ति तथा फर्मले २१ दिनभित्र गोप्य सिलबन्दी गरेर बोलकबोल गर्न सक्ने भन्सार कार्यालयले जनाएको छ।