काठमाडौं- नेपाली कांग्रेसले सत्ता गुमाएको छ। माओवादीसँगको साझेदारीमा केन्द्रदेखि प्रदेशसम्म सरकारमा पुगेको नेपाली कांग्रेसले अहिले गठबन्धन गुमाएको छ। 

माओवादी-कांग्रेसको गठबन्धन भत्किएर नयाँ समीकरण बनेसँगै कांग्रेस सत्ताविहीन हुने भएको हो। गत वर्ष सुरूमा एमालेसँग मिलेर सरकार बनाएका प्रचण्डले फेरि त्यही गठबन्धन ब्युँताएका छन्। 

माओवादी, एमाले, राष्ट्रिय स्वतन्त्र पार्टी र जनता समाजवादीसहितको नयाँ गठबन्धन बनेको छ। योसँगै आजै सबै मन्त्री बाहिरिने र नयाँ मन्त्रिसहितको मन्त्रीमण्डल पुनर्गठन हुने भएको छ। एमाले र माओवादीबाट एक/एक जना मन्त्री समावेश भएर आजै पुनर्गठन हुने बताइएको छ। 

गत वर्ष पुसमा पनि यही गठबन्धन बनेको थियो। त्यसपछि फेरि कांग्रेस भित्रिएर एमाले बाहिरिएको थियो। 

एक वर्षको अन्तरमै एमाले सत्तामा फर्किएको छ। केन्द्रदेखि प्रदेशसम्म फेरि एमालेले सत्ताको साझेदारी पाउने भएको छ। कांग्रेससँगको सहकार्य सुखद नभएको माओवादीभित्र एमालेसँग मिल्नुपर्ने आवाज उठ्दै आएको थियो। 

राष्ट्रियसभाको निर्वाचनमा कांग्रेसले धोका दिएको भन्दै माओवादीमा चर्को आलोचना भएको थियो। सरकार बनेपछि नै मन्त्रीहरूको हेरफेरमा कांग्रेसले साथ नदिएको, सचिवमात्र होइन सहसचिव सरुवामा समेत कांग्रेसले बाहिरबाट हस्तक्षेप गरेको भन्दै प्रचण्डले असन्तुष्टी जनाउँदै आएका थिए। त्यही क्रममा पछिल्लो समय कांग्रेसको महासमितिले चुनावी गठनबन्धन नगर्ने खालको प्रस्ताव ल्याएपछि बलियो साझेदारीको खोजीमा प्रचण्ड लागेका थिए। 

गठबन्धनमात्र होइन पार्टी एकतासम्म नै पुग्नेगरी नयाँ गठबन्धन बनेको नेताहरूले बताएका छन्।