काठमाडौं- अर्थमन्त्री डा प्रकाशरण महतले वित्तीय संस्थामा चुनौती देखापरेको बताएका छन्। नेपाली कांग्रेसको महासमितिको बैठकमा बोल्दै उनले समग्र अर्थतन्त्रमा सुधार देखिएपनि वित्तीय संस्थामा चुनौती देखिएको बताएका हुन्। 

घर जग्गा क्षेत्रमा प्रवाह भएको कर्जा भुक्तानी रोकिँदा खराब कर्जा बढेको र यसले गर्दा बैंक तथा वित्तीय संस्थामा जोखिम बढेको उनले बताएका हुन्। 

बैंकहरूको मुनाफा घटेको र कर्जा विस्तार पनि अपेक्षित नहुँदा वित्तीय प्रणालीमा समस्या भएको उनले बताए। 

यद्यपि बैंकिङ क्षेत्रमा देखिउको चुनौति राष्ट्र बैंकले ट्र्याकमा ल्याउने उनको विश्वास छ। तर सहकारी क्षेत्रमा देखिएको समस्याले भने धेरैतिर सर्वसाधारण मारमा परेको उनले बताए। 

उपयुक्त नियमन बाहिरै ठूलो वित्तीय कारोबार गरेकाले सहकारीका साना बचतकर्ता मारमा परेको उनको भनाइ छ। 

समग्र अर्थतन्त्रमा केही सुधारको प्रयास गरिएको र चालु वर्षमा कम्तिमा चार प्रतिशतको आर्थिक वृद्धि हुने अवस्था रहेको उनले बताए।

सयौँ क्षेत्रमा सुधारका संकेत देखिएपनि उत्पादन वृद्धि तथा उपभोग बढाउनेतर्फ भने अझै पनि चुनौती बाँकी रहेको उनको भनाइ छ। राजस्व संकलन लक्ष्य अनुसार नभएपनि वृद्धिदर देखिएको उनको भनाइ छ।