काठमाडौं- भन्सार विभागले चालु आर्थिक वर्षको ६ महिनामा अनुगमनबाट ७७ करोड १७ लाख ३५ हजार रुपैयाँ थप कर संकलन गरेको छ। 

विभागले साउनदेखि पुससम्मको अवधिमा प्रत्यक्ष अनुगमन प्रणालीबाट सो थप कर संकलन गरेको हो। विभागले प्रविधिको प्रयोगबाट गरेको अनुगमनबाट थप कर संकलन गरेको हो। 

गत वर्षको तुलनामा विभागले चार गुणा कर संकलन गरेको हो। गत वर्षको यही अवधिमा १८ करोड ८६ लाख रुपैयाँ थप कर संकलन भएको थियो। 

भन्सार विभागमा रहेको स्वचालित प्रणालीबाट गरिएको अनुगमनबाट यसरी थप कर संकलन हुँदै आएको छ। आयातकर्ताले गरेको घोषणा, पेस गरेका कागजात र प्रज्ञापनपत्रको प्रणालीले रिड गरेर सूचक दिन्छ। यस्तो सूचकमा गडबडी भएमा त्यसको थप अनुसन्धान हुन्छ। 

विभागले यो प्रणालीलाई प्रभावकारी बनाउनका लागि अपरेटरको छनौट पनि गोलाप्रथाबाट गर्छ। कार्यालय विशेषको अनुगमनका लागि अपरेटर छनौट हुन्छ। 

न्यून बीजकीकरणको जोखिम सूचीमा परेका वस्तुमाथि भन्सार जाँचपासमा कडाइ, रसुवा नाकामा व्यापारीको विरोध

भन्सारलाई पूर्ण प्रविधिमैत्री बनाएर मान्छेको सम्पर्कबिना काम सम्पन्न हुनसक्ने बनाउने योजना सरकारले अघि सारेको धेरै भइसकेको छ। प्रविधिको उपयोगबाट प्रभावकारी अनुगमन हुन्छ। 

पछिल्लो समय यही स्वचालित प्रणालीको अनुगमन तीव्र हुँदा रसुवा भन्सारबाट आयात गर्नेहरूले आन्दोलन नै गरेका थिए। बिलबिजक तथा घोषणामा तालमेल नहुँदा भन्सारले थप कर निर्धारण गर्दै आएको छ। 

यसरी धेरै थप कर निर्धारण भएपछि रसुवा नाकामा व्यवसायीले आन्दोलन गरेका थिए।