काठमाडौं- नेपाल राष्ट्र बैंकका गभर्नर महाप्रसाद अधिकारीको शैक्षिक योग्यतामाथि प्रश्न उठाउँदै सर्वोच्च अदालतमा रिट दर्ता भएको छ।

अधिवक्ता दिपकराज जोशी, प्रतापसिंह ठकुराठी, दामोदर तिम्सिना र चुडामणि भण्डारीले सर्वोच्च अदालतमा रिट दर्ता गराएका हुन्। मन्त्रिपरिषद्, प्रधानमन्त्री तथा मन्त्रिपरिषद्को कार्यालयलाई विपक्षी बनाउँदै दर्ता गरिएको रिटको पेशी शुक्रबार बिहान १० बजेलाई तोकिएको छ।

राष्ट्र बैंक ऐन २०५८ को दफामा २० मा गभर्नर बन्नका लागि न्यूनतम योग्यता स्नातकोत्तर तोकिए पनि गभर्नर अधिकारी चार्टर्ड एकाउन्टेड मात्रै भएको भन्दै रिट दर्ता भएको हो। 

अधिकारीलाई केपी शर्मा ओली नेतृत्वको सरकारले २०७६ चैत २४ गते गभर्नर नियुक्ति गरेको हो।

रिटमा सरकारको उक्त निणर्य उत्प्रेषणको आदेशबाट बदर गर्दै न्यूनतम योग्यता नपुगेकाले अधिकारीविरुद्ध अधिकारपृच्छाको आदेश जारी गर्न माग गरिएको छ।