काठमाडौं- नेपाल राष्ट्र बैंक लचिलो नीति लिएर सकारात्मक बनेसँगै घरजग्गाको कारोबारसमेत बढ्न थालेको छ। राष्ट्र बैंकले मौद्रिक नीतिको पहिलो त्रैमासिक समीक्षामार्फत घरजग्गा कारोबार सहज हुन सहयोग गर्नेगरी नीति लिएको थियो। 

भूमि व्यवस्थापन तथा अभिलेख विभागले सार्वजनिक गरेको तथ्यांकानुसार कात्तिकको तुलनामा मंसिरमा घरजग्गाको कारोबार बढेको हो।

विभागका अनुसार मंसिरमा ४१ हजार ८५१ लिखत पारित भएको छ। कात्तिकमा २६ हजार ४६ लिखत पारित भएको थियो। तथ्यांकअनुसार मंसिरमा १६ हजारले कारोबार बढेको हो।

घरजग्गा कारोबारबाट मंसिरमा २ अर्ब ८६ करोड ५० लाख ११ हजार २१ रुपैयाँ राजस्व संकलन भएको विभागले जनाएको छ।

राष्ट्र बैंकको समीक्षाले घरजग्गा कारोबारको जोखिमभार १५० बाट घटाएर १२५ मा झारेको छ।

यस्तै ५० लाखभन्दा बढी सेयर कर्जाको जोखिमभार पनि राष्ट्र बैंकले १५० बाट १२५ मा झारेको छ। यस व्यवस्थाले घरजग्गा र सेयर बजारको क्षेत्रमा कर्जा प्रवाह बढ्ने देखिएको छ।