काठमाडौं- साढे एक वर्षपछि गएको महिना नेपालमा भारतमा भन्दा न्यून मूल्यवृद्धि रेकर्ड भएको छ। 

नेपाल राष्ट्र बैंकको तथ्यांकअनुसार नोभेम्बरमा नेपालमा मूल्यवृद्धि गत वर्षको यही महिनाको तुलनामा ५.३८ प्रतिशत कायम भएको छ। यो सोही अवधिमा भारतको तुलनामा ०.१७ प्रतिशत हो। 

नोभेम्बरमा भारतको उपभोक्ता मूल्यवृद्धि ५.५५ प्रतिशत रहेको थियो। पछिल्लो समय अक्सर भारतको तुलनामा उच्च मूल्यवृद्धि हुँदै आएको नेपालमा कात्तिकमा भने न्यून भएको हो। 

यसअघि सन् २०२१ को अप्रिलमा भारतको तुलनामा नेपालमा उपभोक्ता मूल्यवृद्धि न्यून भएको थियो। त्यसपछि एकैपटक नोभेम्बरमा न्यून भएको छ। 

औषत मूल्यवृद्धि भने अझै पनि भारतको तुलनामा नेपालमा १.५८ प्रतिशतले उच्च  छ। 

कात्तिकमा नेपालमा न्यून कारोरबार भएको र यही अवधिमा वस्तुभन्दा सेवाको कारोबार उच्च हुँदा पनि मूल्यवृद्धि न्यून कायम भएको हो। 

नेपालको तुलनामा भारतमा न्यून मूल्यवृद्धि हुँदा नेपाली मुद्राको क्रयशक्ति प्रभावित हुन्छ। भारतीय मुद्रासँग स्थिर विनिमय दर भएपनि बजारको क्रयशक्ति तथा बजारको सुपथपन प्रभावित हुँदै आएको छ। 

विश्व बैंकले पछिल्लो समय निकालेको एक प्रतिवेदनले भारतको तुलनामा नेपालमा उच्च मूल्यवृद्धि हुँदा नेपाली मुद्राको अधिमूल्यण बढ्दै गएको उल्लेख गरेको छ।