कटारी- उदयपुरको कटारी नगरपालिका-१ कालीखोला गाउँबाट जग्गा नापी सुरु भएको छ। पहिलो चरणमा ऐलानी जग्गाको नापी सुरु भएको राष्ट्रिय भूमि आयोग उदयपुरका अध्यक्ष बलबहादुर तामाङले जानकारी दिए। भूमिहीन दलित, सुकुम्बासी र अव्यवस्थित ढंगले बसोबास गरेकाहरूलाई नापजाँच गरेर जग्गाधनी प्रमाणपत्र प्रदान हुने अध्यक्ष तामाङले बताए।
यसपटक कटारी नगरभित्रका सबै वडाको जग्गा नापी गरिने नगरपालिकाका प्रमुख राजेशचन्द्र श्रेष्ठले बताए। नापी सुरु भएपछि भूमिहीनहरूमा पुनः उत्साह थपिएको छ। 'नापीको काम सुरु भएको छ यसपटक समस्या समाधान हुने आशामा छौँ,' भूमि अधिकारमञ्च कटारीका अध्यक्ष बालकृष्ण थापाले भने।
कटारी नगरपालिकाका प्रमुख प्रशासकीय अधिकृत अनिल किरातीले नगरभित्र जग्गा नापीको काम सुरु भएकाले अब भने भूमिहीन, सुकुम्बासी तथा अव्यवस्थितले लालपुर्जा पाउने गरी काम अघि बढेको बताए। उदयपुरमा कटारीबाहेक बेलका, चौदण्डीगढी, त्रियुगा नगरपालिकामा जग्गा नापजाँच भइरहेको आयोगको उदयपुर कार्यालयले जनाएको छ।
.jpg)
रौतामाई गाउँपालिकामा पनि जग्गा नापी सुरु भएको आयोगका अध्यक्ष तामाङले बताए। जिल्लामा जग्गा नापीको कामलाई तीव्रता दिएको बताउँदै उनले सबै स्थानीय सरकारसँगको सहकार्यमा नापीको काम पूरा गर्ने प्रतिबद्धता व्यक्त गरे। रासस
