काठमाडौं- संयुक्त उपक्रममा ५ वटा ठेक्काको काम समयमा नगर्ने निर्माण कम्पनीलाई कालोसूचीमा राखिएको छ। सार्वजनिक खरिद अनुगमन कार्यालयले मंगलबार सार्वजनिक सूचना जारी गरि कालोसूचीमा राखेको हो। 

मध्यपहाडी राजमार्गमा समयमा काम नगर्ने निर्माण कम्पनी भारत कन्स्ट्रक्सन/मैनाचुली/सिद्धिसाई जेभीलाई कालोसूचीमा राखिएको छ। यो जेभीमा रहेका तिनवटै निर्माण कम्पनीलाई ३ वर्षका लागि कालोसूचीमा राखिएको छ। 

त्यसैगरि मध्यपहाडी राजमार्गमै ठेक्का पाएर काम गर्ने मैनाचुली/सिद्धिसाई जेभीलाई पनि कालोसूचीमा राखिएको छ। यो जेभीमा रहेका दुई निर्माण कम्पनीलाई २ वर्षका लागि कालोसूचीमा राखिएको हो। 

त्यसैगरि समयमा काम नगर्ने शेर्पा/हेना/सुनामी जेभी, कास्र्याङ कन्स्ट्रक्सन एन्ड सप्लायर्स र इजोन निर्माण सेवालाई १ वर्षका लागि कालोसूचीमा राखिएको छ। 

कालोसूची अवधिभर यी निर्माण कम्पनीले कुनै पनि सरकारी टेन्डरमा सहभागी हुन पाउने छैनन्। 

सार्वजनिक खरिद अनुगमन कार्यालयले ठेक्का लगाउने निकायको सिफारिसका आधारमा सार्वजनिक खरिद ऐन २०६३ को दफा ६२ को उपदफा १ बमोजिम कालोसूचीमा राख्दै आएको छ।