काठमाडौं- नेपाली बजारमा यो साता लगातार बढेको सुनको मूल्य बिहीबार स्थिर रहेको छ। बुधबार हालसम्मकै उच्च बिन्दुमा पुगेको सुनको मूल्य बिहीबार स्थिर रहेको नेपाल सुनचाँदी व्यवसायी महासंघले जनाएको छ।
महासंघका अनुसार बिहीबारका लागि छापावाल सुनको मूल्य तोलाको एक लाख १९ हजार ३ सय रूपैयाँ र तेजाबी सुनको मूल्य प्रतितोला एक लाख १८ हजार ७ सय ५० रूपैयाँ तोकिएको छ। बुधबार पनि सुन सोही मूल्यमा कारोबार भएको थियो।
यो साता सोमबार र मंगलबार पनि सुनको मूल्यले रेकर्ड कायम गरेको थियो। आइतबार तोलामा ६ सय रूपैयाँले बढेको सुनको मूल्य सोमबार पाँच सय, मंगलबार तीन सयले बढेको थियो भने बुधबार एकैदिन प्रतितोला १६ सय रूपैयाँले वृद्धि भएको थियो।
आज चाँदीको मूल्य पनि स्थिर छ। बुधबार तोलामा २० रूपैयाँले बढेर प्रतितोला १५ सय ५० रूपैयाँमा कारोबार भएको चाँदी बिहीबार पनि सोही मूल्यमा कारोबार भइरहेको महासंघले जनाएको छ।
