दोधारा चाँदनी- कञ्चनपुरको दोधारा चाँदनीमा प्रस्तावित सुक्खा बन्दरगाह निर्माण गर्न विस्तृत परियोजना प्रतिवेदन (डीपीआर) तयार भएको छ। नेपाल इन्टर मोडल यातायात विकास समितिका इन्जिनियर अनिश केसीले भारत सरकारले सुक्खा बन्दरगाह निर्माणका लागि डीपीआर तयार गरेर पठाएको जानकारी दिए।

उनका अनुसार सुक्खा बन्दरगाह निमार्णका लागि पाँच अर्ब ७५ करोड रूपैयाँ लागत अनुमान गरिएको छ। सुक्खा बन्दरगाह भारतको पूर्ण लगानीमा बन्ने उनले बताए। 'सुक्खा बन्दरगाह निर्माण गर्न भारतले डीपीआर तयार गरेर पठाएको छ', इन्जिनियर केसीले भने, 'सन् २०२४ देखि सुरु भई सन् २०२६ सम्म निर्माण सक्ने डीपीआरमा उल्लेख गरिएको छ। बन्दरगाह निमार्णका लागि दोधारा चाँदनी नगरपालिकास्थित मायापुरी र गौरीशंकर सामुदायिक वनको करिब दुई सय ८० बिघा जमिन प्रयोग हुनेछ।'

सुक्खा बन्दरगाहमा दुईवटा गोदाम, भन्सार जाँच, क्वारेन्टाइन, इमिग्रेसन र सुरक्षा भवनलगायत अन्य पूर्वाधार निर्माण हुने इन्टर मोडल यातायात विकास समितिले जनाएको छ। भारतले एसियन राजमार्गसँग जोड्न पहुँच मार्ग निर्माणको काम सुरु गरिसकेको छ। सुक्खा बन्दरगाह निर्माण हुने स्थलमा रुख कटानका लागि वातावरणीय प्रभाव मूल्यांकन (ईआईए) स्वीकृति भइसकेको छ। 'दस/पन्ध्र दिनभित्रै प्रतिवेदन मन्त्रालयमा पेस हुन्छ', इन्जिनियर केसीले भने, 'मन्त्रिपरिषद्ले रुख कटान गर्ने निर्णय गरेपछि निमार्ण कार्य अघि बढ्नेछ।'

बन्दरगाह क्षेत्रमा एक हजार नौ सय ८९ रुख कटान गर्नुपर्ने हुन्छ। विसं २०६४ मा पहिलो पटक सरकारले दोधारा चाँदनीमा सुक्खा बन्दरगाह निर्माण गर्ने प्रस्ताव गरेको थियो। त्यसपछि पटकपटक अध्ययनका लागि टोली आए पनि काम अगाडि बढ्न सकेको थिएन। सुक्खा बन्दरगाह निर्माणसँगै पश्चिमी नाका सञ्चालनमा आए सम्भावनाको ढोका खुल्ने नेपाल उद्योग वाणिज्य महासंघका महानिर्देशक गोकर्ण अवस्थीले बताए।

'यो नाका चालु भए नेपाल भारतबीच सहज आवागमन हुने र लामो दुरीबाट आवतजावत गर्नुपर्ने बाध्यता हट्छ', उनले भने, 'यहाँ औद्योगिक र कृषि क्षेत्रको विकास गर्न सके यसले भारतको उत्तर प्रदेश र उत्तराखण्डमा बजार पाउँछ। दोधारा र चाँदनीमा सुक्खा बन्दरगाह स्थापनापछि छिमेकी मुलुक भारतमा रहेका उद्योगका शाखा नेपालमा खुल्न सक्ने र यहाँबाट उत्पादन गर्न सक्ने सम्भावना रहेको छ। बन्दरगाहको काम सुरु भइसकेको छ, अब हामीले त्यहाँबाट आयात मात्रै गर्ने की निर्यात पनि गर्ने यसको पूर्वतयारीमा लाग्न जरुरी छ।' 

यहाँका उत्पादन निर्यात गर्ने गरी सुदूरपश्चिम प्रदेश सरकारले योजना बनाउन जरुरी रहेको उनको भनाइ थियो। यस पटक सरकारले सुक्खा बन्दरगाह निर्माण गर्नेमा यहाँका व्यवसायी आशावादी छन्।

कञ्चनपुर उद्योग वाणिज्य संघका वरिष्ठ उपाध्यक्ष दिनेश मल्लले सुक्खा बन्दरगाह निर्माण भए सुदूरपश्चिममा हुने व्यापारको लागत र समय दुवै घट्ने बताए।'अहिले लामोबाटो प्रयोग गरेर यहाँ सामान ल्याउनुपर्ने बाध्यता छ', उनले भने, 'यो नाकाबाट भारतका औद्योगिक क्षेत्र छोटो दुरीमा रहेकाले यहाँको व्यापारको लागत र समय घटाउँछ।'

यो नाका सञ्चालनमा आए सुदूरपश्चिमको व्यापार फस्टाउने अपेक्षा गरिएको छ। रासस