काठमाडौं- काठमाडौं महानगरपालिकाले ३२ वटै वडामा वडास्तरीय राजस्व अनुगमन थालेको छ। कामपाका अनुसार मुख्य गरी लामो समयदेखि करको दायरामा नआएका करदाताको विवरण संकलन गर्नका लागि स्थलगत अनुगमन थालिएको हो।

कामपाको राजस्व विभागका प्रमुख धुव्र काफ्लेले सम्पत्ति कर, बहाल कर र व्यवसाय कर बुझाउनुपर्ने दायित्व भएका करदातामध्ये अग्रिम कर बुझाउनेप्रति आभार प्रकट गर्न, छुट सुविधाका विषयमा जानकारी दिन, कर नियमित तिर्नका लागि प्रोत्साहन गर्न वडामा स्थलगत अनुगमन सुरु गरिएकोे जानकारी दिए।

प्रत्येक वडाले वडा सदस्यको नेतृत्वमा तीन सदस्यीय अनुगमन टोली गठन गरेको छ। टोलीमा कर्मचारी एकजना र स्थानीयमध्ये एकजना सदस्य रहने व्यवस्था रहेको छ। टोलीले सचेतनाका साथै कर तिर्नका लागि वडामा आउन वा अनलाइनबाट तिर्न मौखिक अनुरोध गर्नेछ। मौखिक अनुरोधको अटेर गर्नेलाई वडा सचिवमार्फत पत्राचार हुनेछ। स्थलगत अवस्थाको विवरण संकलन गर्नेछ। संकलित विवरणअनुसार तथ्यांक तयार पारी राजस्व विभागका पेस गर्ने बताइएको छ।

‘सात तले घरले सात हजार बहाल सम्झौता देखाएका छन्। जबकि हरेक भूमिगत तला र जमिन तला व्यावसायिक प्रयोजनमा देखिन्छन्। त्यस माथिका तला बहालमा लगाइएको छ', उनले भने, 'एउटै तलामा सात भन्दा धेरै कोठा छन्। हरेक कोठाको सात हजारभन्दा धेरै वहाल उठाउने गरिएको छ। यसरी करदाताले झुटो विवरण दिएपछि स्थलगत अनुगमन थालिएको हो।'

विगतका वर्ष भन्दा चालु आर्थिक वर्षमा क्रमिक रुपमा करतादाको सङ्ख्या बढे पनि अपेक्षाकृत सबै करदाता कानूनी दायरामा नआएको कामपाको भनाइ छ। कामपाले चालु आर्थिक वर्षको पहिलो दुई महिनाको अवधिमा एक अर्ब १७ करोड १३ लाख ७५ हजार रूपैयाँ राजस्व असुल गरेको जनाएको छ।

चालु आवका लागि कामपाले १० अर्ब ४१ करोड रूपैयाँ राजस्व असुलको लक्ष्य लिएको छ। चालु आवको दुई महिनाको अवधिमा सबैभन्दा बढी घरबहाल करबाट ५२ करोड रूपैयाँ असुल भएको राजस्व विभागका प्रमुख काफ्लेले बताए। त्यसैगरी सम्पत्ति करबाट २५ करोड रूपैयाँ असुल भएको छ।

गत वर्षभन्दा यस वर्ष सम्पत्ति करमा मात्रै छ सय ४८ करतादा बढेका छन्। अहिले कामपामा तीन लाखभन्दा बढी करदाता छन्। रासस