काठमाडौं- सरकारले जाजरकोट भूकम्पमा परी घाइते भएकाहरुको नि:शुल्क उपचार गराउने निर्णय गरेको छ। 

आइतबार बिहान सिंहदरबारमा बसेको मन्त्रिपरिषद्‌को आकस्मिक बैठकले शुक्रबार राति जाजरकोट केन्द्रबिन्दु भइ गएको भूकम्पमा परी घाइते भएकाहरुको उपचार सबै अस्पतालमा नि:शुल्क गराउने निर्णय गरेको हो।

बैठकले भूकम्प प्रभावित क्षेत्रमा तत्काल राहत पुर्‍याउने गरी तयारी थाल्ने निर्णय गरेको छ। बैठकले एकद्वार प्रणालीमार्फत् राहत वितरण गर्ने निर्णय पनि गरेको छ। 

उपचारको पहिलो केन्द्र नेपालगञ्ज र दोस्रो सुर्खेत बनाइएको छ। आइतबारको मन्त्रिपरिषद्को बैठकले उद्धारको काम प्रभावकारीरूपमा भएको निष्कर्ष निकालेको छ। अब राहत वितरणमा जोड  दिने समेत सरकारले निर्णय गरेको छ।

सहयोगका लागि सरकारले विभिन्न दातृ निकाय, अन्तर्राष्ट्रिय संघ-संस्थालाई पनि अपिल समेत गरेको छ।