काठमाडौं- बुद्ध एयरले जाजरकोट भूकम्प पीडितका लागि एक करोड रूपैयाँ सहयोग उपलब्ध गराउने भएको छ। 

बुद्ध एयरले शनिबार प्रधानमन्त्री दैवी प्रकोप राहत कोषमा एक करोड रूपैयाँ सहयोग दिने निर्णय गरेको हो। साथै उद्धार तथा राहत सामग्री ढुवानी सहयोगका लागि पनि प्रतिबद्ध रहेको बुद्ध एयरले जनाएको छ।

गएराति जाजरकोटको बारेकोट गाउँपालिका-१, रामीडाँडा केन्द्रबिन्दु भइ गएको भूकम्पका कारण जाजरकोट र रुकुमपश्चिममा ठूलो जनधनको क्षति भएको छ। भूकम्पमा परी ज्यान गुमाउनेको सङ्ख्या एक सय ३७ पुगेको छ।

भूकम्पबाट जाजरकोटमा ८१, रुकुम पश्चिममा ७२, जुम्ला र दैलेखमा तीन/तीन तथा सल्यानमा एक जना घाइते भएका छन्। उनीहरुको जाजरकोट, रुकुम पश्चिम, सुर्खेत र बाँकेका विभिन्न अस्पतालमा उपचार भइरहेको छ। 

तीनै तहका सरकारले उद्धार तथा राहतको कार्य जारी राखेका छन्।