काठमाडौं- होटल संघ नेपालले सदस्य होटलहरुमार्फत सञ्चालन गरेको दसैँ परिकार उत्सवमा पर्यटकहरुको उत्साहजनक रुचि बढेको छ। सो उत्सव सञ्चालन गरेका होटलहरुले अग्रिम बुकिङ समेत बढेको जनाएका छन्।

उत्सव सञ्चालन गरेका झापास्थित होटल किङ्सबेरी र मेची क्राउन, भैरहवाको टाइगर प्यालेस, मनिग्रामको ड्रिमल्यान्ड गोल्ड रिसोर्ट, बुटवलको ड्रिम इन्टरनेसनल होटल, चितवनको जंगल सफारी लज, पोखराको होटल बाराही र काठमाडौंका एयरपोर्ट होटल, अलफ्ट होटल, द्वारिकाज होटल र नेपाली घरलगायतका सदस्य होटलहरुमा पर्यटक तथा स्थानीयहरुको राम्रो सहभागिता रहेको र फुलपातीपछि सुरु हुने सार्वजनिक बिदा अवधिमा अग्रिम बुकिङ समेत बढेको संघले विज्ञप्तिमार्फत जनाएको छ।

होटलहरुले दसैँमा खाइने खासगरी थरिथरीका मांसाहारी परिकार पर्यटकहरु माझ आकर्षक छुटका साथ पेस गरेका छन्।

घटस्थापनादेखि कात्तिक ११ गते कोजाग्रत पूर्णिमासम्म १५ दिन सञ्चालन हुने सो कार्यक्रमले पर्यटकहरु माझ दसैँ बिदाको रौनक थप्नुका अतिरिक्त रैथाने खाना प्रवर्द्धन गर्ने उद्देश्य रहेको होटल संघ नेपालले जनाएको छ।

काठमाडौंमा जारी गैरआवासीय नेपालीहरुको विश्व सम्मेलनमा संसारभरबाट आएका सहभागीहरु र विदेशी नियोगहरुमा कार्यरत विदेशीहरु, कर्पोरेट ग्राहकहरु र आन्तरिक पर्यटकहरुको समेत उत्सवमा उल्लेखनीय सहभागिता रहेको पनि जनाइएको छ।