काठमाडौं-  भारत सरकारले नेपालका लागि चामल निर्यात खुला गरिदिएको छ। गैरबासमती चामलको परिमाण तोकेर भारतले नेपालका लागि निर्यात अनुमति दिने निर्णय गरेको हो। 

भारतले नेपालका लागि ९५ हजार टन गैरबासमती चामल निर्यातको कोटा स्वीकृत गरेको छ। भारतीय सरकारले जारी गरेको सूचनामा नेपालसहितका सात देशले परिमाणसहितको गैरबासमती चामल पाउनेछन्। 

भारतले आन्तरिक बजारको मूल्यवृद्धिलाई ध्यान दिँदै गैरबासमती चामलको निर्यातमा रोक लगाएको थियो। तर सरकारले निर्णय गरेर निश्चित देशलाई खोल्दै आएको छ।

भारत सरकारले यही जुलाई २० मा गैरबासमती सेतो चामलको निर्यातमा प्रतिबन्ध लगाएको थियो।

नेपालले १ लाख टन चामल आयातका लागि अनुरोध गरेको थियो। तर भारतले भने ९५ हजार टनको अनुमति दिएको हो। भारतबाट यो चामल सरकारी स्वामित्वको कम्पनीमार्फत आउने छ। 

नेपालमा भारतबाट चामल आयात हुँदै आएको छ। भारतले प्रतिबन्ध लगाएकाले आन्तरिक बजारमा अझै थप मूल्यवृद्धि तथा अभाव हुनसक्ने जोखिम रहेको छ।