चितवन- चितवन राष्ट्रिय निकुञ्जभित्रका सात वटा होटल बन्द भएको १२ वर्षपछि तिनै होटलको झल्को दिने गरी सौराहामा सिद्धार्थ भिलासा वनवास रिसोर्ट सञ्चालनमा ल्याइएको छ। वरिपरी जंगलले घेरिएको रिसोर्टभित्र पनि विभिन्न जातका रुख बिरुवाले निकुञ्जको झल्को दिने गर्दछ। रिसोर्ट छिर्ने जोकोहीलाई निकुञ्जभित्र पुगेको आभास हुन्छ।

सौराहाको बजारी क्षेत्रबाट केही पर खैरहनी नगरपालिका-१३ हर्नरीमा यो रिसोर्ट छ। वन र वन्यजन्तु संरक्षणको क्षेत्रमा दुई दशकभन्दा बढी समय बिताएका संरक्षणकर्मी स्थानीयवासी वासु ढुंगानाले नौ वर्षअघि रिसोर्ट निर्माण सुरु गरेका थिए।

बन्दै गर्दा संविधानसभा सदस्य एवं व्यवसायी उमेश श्रेष्ठ पनि जोडिए। यससँगै नेपालमा हस्पिटालिटी क्षेत्रमा ख्याती कमाएको सिद्धार्थ ग्रुपसमेत यसमा जोडिएर रिसोर्ट सञ्चालनमा ल्याइएको हो। चितवन राष्ट्रिय निकुञ्ज स्थापना भन्दा पहिला खुलेको टाइगर टप्ससहित सात वटा होटल विसं २०६८ मा बन्द भएपछि खर्चालु पर्यटक यहाँ आउने क्रम घटेकामा यस होटलले त्यस्ता पर्यटकलाई भित्र्याउन समेत सहयोग पुग्ने अपेक्षा लिइएको छ।

सिद्धार्थ हस्पिटालिटीले आफ्नो लक्जरी ब्रान्ड सिद्धार्थ भिलासाको दोस्रो शाखाको रूपमा यो रिसोर्ट सञ्चालनमा ल्याएको सिद्धार्थ ग्रुपका प्रमुख कार्यकारी अधिकृत कृष्ण न्यौपानेले बताए। उनका अनुसार ग्रुपका होटल, रेष्टुरेन्ट, बेकरी क्याफे, होटल व्यवस्थापनजस्ता हस्पिटालिटी क्षेत्रमा ३० वटा शाखा सञ्चालनमा छन्। उनले आन्तरिक तथा बाह्य पर्यटकलाई भित्र्याउन यो होटल सहयोगी बन्ने बताए। रिसोर्ट निर्माणमा ४५ करोड रूपैयाँ खर्च भएको जानकारी दिँदै वनवास चितवन प्रालिका अध्यक्ष वासु ढुंगानाले रिसोर्ट स्थापनासँगै देश तथा विदेशबाट बुकिङ गर्नेक्रम सुरू भएको बताए।

तीन बिघा पाँच कठ्ठा क्षेत्रफलमा फैलिएको यो रिसोर्ट कुमरोज र जन्कौली मध्यवर्ती सामुदायिक वन नजिक छ। यहाँ २४ भिल्ला र दुई स्वीटसहित ३४ सुविधायुक्त कोठा छन्। उनले भने, 'भिल्ला काठले बनेका, माटोले पोतिएका, खपटाले छाएका छन्। सम्पूर्ण भिल्लाको नामाकरण चाराको नामबाट राखिएको छ।'

रिसोर्ट परिसरमा ठूलो ताल र स्विमिङ पुल पनि निर्माण गरिएको छ। पोखरीमा माछाका भुरा नियमित राखिन्छ। अध्यक्ष ढुंगानाले भने, 'त्यहाँ हुर्किएका माछा निकुञ्ज र मध्यवर्ती क्षेत्रबाट चरा आएर खान्छन्।'

रिसोर्ट परिसरमा विभिन्न प्रजातिका चराको बासस्थान देख्न सकिन्छ। विचरणका लागि पनि चरा टाढाटाढाबाट यहाँ आउने गर्दछन्। रिसोर्ट परिसरमा रोपिएका रुख पनि चराचुरुङ्गीले मन पराउने फलफलूलका बिरुवा रोपिएको छ। उनले भने, 'खुल्ला जंगलभित्र छुट्टाछुट्टै भिल्ला भएका कारण एक अर्का कसैलाई कुनै किसिमको असर गर्दैन।' त्यसैले यसलाई वनवासा नामाकरण गरिएको उनले बताए।

रिसोर्टमा दुईवटा सभा कक्षका साथै नजिकै रहेका सामुदायिक वनमा रमाउने जनावरको दृश्यावलोकन गर्न सकिने रेष्टुरेन्ट पनि छ। यहाँ बस्न विदेशी पर्यटकले दुई रात, तीन दिनको प्याकेजका लागि २५० देखि चार सय डलरसम्म तिर्नुपर्छ। यो रकमबाट पर्यटकले हात्ती सफारीबाहेकका प्याकेज प्राप्त गर्न सक्छन्। आन्तरिक पर्यटक एक जोडीलाई दश हजार रूपैयाँमा एक रात बसाइ र ब्रेकफास्टको सुविधा रहेको अध्यक्ष ढुंगानाले जानकारी दिए।

होटलका अर्का सञ्चालक श्रेष्ठले पर्यापर्यटनको क्षेत्रमा संरक्षणकर्मी ढुंगानाको यो अभियानलाई सफल बनाउन आफूहरु जोडिएको बताए। एक व्यक्तिले गर्न नसक्ने काम समूहबाट सम्भव हुने भन्दै उनले वनवास समूहमै सञ्चालनमा ल्याइएको बताए।

नेपालमा पर्यटनको क्षेत्रमा प्रचुर सम्भावना रहेको भन्दै उनले देशभर सर्किट निर्माण गरेर होटल रेष्टुरेन्ट सञ्चालनमा ल्याउने अभियानमा आफू पनि जोडिएको उल्लेख गरे। राष्ट्रिय र अन्तर्राष्ट्रियरूपमा नेपालको पर्यटकीय महत्वको बारेमा व्यापक प्रचारप्रसार गरेर विदेशी पर्यटक भित्र्याउनुपर्नेमा जोड दिँदै उनले सरकारले नीतिमा परिवर्तन गरी निजी क्षेत्रलाई प्रोत्साहन गर्नुपर्नेमा जोड दिए। होटल आइतबार घटस्थापनाका दिन शुभारम्भ गरिएको थियो। रासस