काठमाडौं- सरकारले इजरायलमा १० नेपालीको मृत्यु भएकोमा मंगलबार राष्ट्रिय शोकको घोषणा गरेको छ। 

सोमबार बसेको मन्त्रिपरिषद्‌को विशेष बैठकले उक्त निर्णय गरेको हो। यस्तै बैठकले इजरायल घटनामा ज्यान गुमाएकाको परिवारलाई राहतस्वरुप प्रतिपरिवार १० लाख रूपैयाँ दिने निर्णय पनि गरेको छ।

बैठकले त्यहाँ रहेका नेपाल फर्किन चाहने नेपालीलाई यथाशीघ्र ल्याउने निर्णय पनि गरेको सरकारका प्रवक्ता एवं सञ्चार तथा सूचना प्रविधिमन्त्री रेखा शर्माले जानकारी दिइन्। मन्त्री शर्माका अनुसार परराष्ट्र मन्त्रालयले इजरायल सरकारसँग समन्वय गरी यस घटनामा निधन भएका नेपालीको शव यथाशीघ्र स्वदेश ल्याउने तयारी भएको छ।

यस्तै इजरायलस्थित नेपाली दूतावासले इजरायल सरकारसँगको समन्वय र सहयोगमा यस घटनामा बेपत्ता भएका नेपालीको खोजीमा तीव्रता दिने एवं घाइतेहरुको तत्काल उपचारका लागि आवश्यक समन्वय र सहजीकरण गर्ने निर्णय पनि भएको छ।

इजरायलमा जारी हिंसात्मक आक्रमणमा परी नेपालबाट गएकामध्ये १० विद्यार्थीको मृत्यु भएको छ।