काभ्रे- काभ्रेपलाञ्चोकमा चालु आर्थिक वर्ष २०८०/०८१ मा तीन सय ७७ सिँचाइ आयोजना निर्माणको काम सञ्चालन हुनेछ। यसमध्ये सात वटा ठूला सिँचाइ आयोजना रहेको जलस्रोत तथा सिँचाइ डिभिजन कार्यालय धुलिखेलले जनाएको छ।

बागमती प्रदेश सरकार र संघीय सरकारबाट चालु आवका लागि विनियोजित बजेटबाट यस वर्ष जिल्लामा तीन सय ७५ वटा सिँचाइ योजना सञ्चालन हुने भएका हुन्। कार्यालयका सूचना अधिकारी इन्जिनियर दीपक थापाका अनुसार यस वर्ष जिल्लामा सञ्चालन हुने ठूला सिँचाइका आयोजनामा नमोबुद्ध नगरपालिका-८ मा एक करोड १७ लाख रूपैयाँको पिपलटार सिँचाइ योजना, रोशी गाउँपालिका-४ मा ९० लाख रूपैयाँको कटुञ्जबेँसी लिफ्ट सिँचाइ (सोलार प्रणाली) योजना, नमोबुद्ध-२ मा ९० लाख रूपैयाँको काशीखण्ड सिँचाइ योजना, नमोबुद्ध-६ मा ८० लाख रूपैयाँको जाइफल डेडा तल्लोबेँसी सिँचाइ योजनाका लागि बजेट विनियोजन भएको छ।

यस्तै खानीखोला गाउँपालिका-७ मा ९० लाख रूपैयाँको बागमती दुर्लुङ दोभान बोरनवेशी महाँकाल बृहत् सिँचाइ आयोजना, रोशी-९ मा ८० लाख रूपैयाँको मंगलटार लिफ्ट सिँचाइ योजना र सोही गाउँपालिका वडा नं ६ मा दुई करोड रूपैयाँको महाभारत सेती शिकारी लेखपानी कालिञ्चोक खार्पाचोक सिँचाइ योजनाको काम हुने थापाले बताए। उनका अनुसार चालु आवमा निर्माण हुने ठूला सिँचाइ योजनामध्ये कटुञ्जेबेँसी लिफ्ट सिँचाइ, जाइफल डेडा तल्लोबेँसी र बागमती दुर्लुङ दोभान बोरनबेँसी सिँचाइ योजनाको विस्तृत परियोजना प्रतिवेदन (डीपीआर) अघिल्लो आवमै सकिएको हो।

चालु आवमा बागमती प्रदेश सरकारबाट सिँचाइका ठूला साना गरी तीन सय ५२ योजनाअन्तर्गत जिल्लाको पाँचखाल नगरपालिकामा ३८, मण्डनदेउपुर नगरमा ३९, भुम्लु गाउँपालिकामा २०, धुलिखेल नगरमा २४, बनेपा नगरमा १५, पनौती नगरमा साना ठूला सिँचाइ गरी २३ योजना, नमोबुद्ध नगरमा २६, रोशीमा ५६, तेमालमा २५, महाभारतमा २६, खानीखोलामा २१, बेथानचोकमा १३ र चौरीदेउराली गाउँपालिकामा २६ वटा योजनामा बजेट विनियोजन भएको कार्यालयले जनायो।

यस वर्ष संघीय सरकारबाट भने करिब २५ वटा योजनामा बजेट विनियोजन गरिएको छ। आयोजना सञ्चालनार्थ ठेक्का आह्वान तथा सम्झौता प्रक्रियाको काम भइरहेको थापाले बताए। काभ्रेपलाञ्चोकमा १३ स्थानीय तह छन्।

कार्यालयले गत आवमा कुल सिँचाइ योजनामध्ये ८९ प्रतिशतको निर्माणकार्य सम्पन्न गरेको जनाएको छ। जसमध्ये प्रदेशतर्फका एक सय १३ मध्ये एक सय आठ र संघीय सरकारतर्फका ६० योजनामध्ये ४६ वटाको काम सम्पन्न गरेको थापाले बताए। गत वर्षबाट सुरु गरिएका १३ वटा बहुवर्षीय सिँचाइका योजनामध्ये पाँच योजनाको काम सम्पन्न भइसकेको छ। रासस