काठमाडौं- बालुवाटारस्थित ललिता निवासको सरकारी जग्गा हिनामिना प्रकरणमा प्रहरीको केन्द्रीय अनुसन्धान ब्यूरो (सीआईबी) ले २ सय ८६ जनालाई प्रतिवादी बनाउन सिफारिस गरेको छ। 

यस प्रकरणको अनुसन्धान गरेको सीआईबीले मंगलबार सरकारी वकिल कार्यालयलाई राय सुझावसहितको अनुसन्धान प्रतिवेदन बुझाएको थियो। प्रतिवेदनमा सरकारी जग्गा व्यक्तिका नाममा नामसारी गरेको आरोपमा सीआईबीले पूर्वमन्त्री विजय गच्छदार, पूर्वभूमिसुधार तथा व्यवस्था मन्त्री चन्द्रदेव जोशीलगायत २ सय ८६ जनालाई प्रतिवादी बनाएको हो।

प्रतिवादीमध्ये २१ जनाको मृत्यु भइसकेको छ। ललिता निवास प्रकरणमा सीआईबीले पूर्वप्रधानमन्त्रीद्वय माधवकुमार नेपाल, डा. बाबुराम भट्टराईको समेत बयान लिएको थियो।

ललिता निवासको जग्गा हिनामिना भएको विषयमा डेढ वर्षअघि नै सीआईबीले अनुसन्धान टुंग्याएर जिल्ला सरकारी वकिलको कार्यालय काठमाडौंमा प्रतिवेदन बुझाएको थियो। तर सरकारी वकिल कार्यालयले अनुसन्धान पूर्ण नभएको र थप अनुसन्धान आवश्यक पर्ने भन्दै फाइल फिर्ता गरेको थियो। २०४९, २०६२, २०६७ र २०६९ सालमा गरी चारपटक सरकारी जग्गा व्यक्तिका नाममा दर्ता गरिएको सीआईबीको अनुसन्धानले देखाएको थियो।

ललिता निवासको जग्गा हिनामिना प्रकरणमा एक भूतपूर्व उपप्रधानमन्त्री, तीन पूर्वमन्त्री र आफ्नै एक पूर्वप्रमुख आयुक्तसहित १ सय ७५ जनाविरुद्ध अख्तियार दुरुपयोग अनुसन्धान आयोगले विशेष अदालतमा दायर गरेको मुद्दा विचाराधीन अवस्थामा नै छ। बालुवाटारस्थित बहुमूल्य जग्गा व्यक्तिको नाममा दर्ता गरेको ठहर गर्दै उनीहरूविरुद्ध मुद्दा दायर गरिएको हो।

यी हुन् २ सय ८६ प्रतिवादीहरु :