काठमाडौं- गत आर्थिक वर्ष २०७९/८० मा ओभर द काउन्टर (ओटीसी) बजारमा विभिन्न ८४ कम्पनीको दुई करोड १२ लाख ६४ कित्ता सेयर कारोबार भएको छ।
नेपाल स्टक एक्सचेन्ज (नेप्से) ले जारी गरेको गत आर्थिक वर्षमा ओटीसी बजारमा भएको कारोबारको विवरणअनुसार हालसम्म ओटीसी बजारमा कारोबारका लागि हालसम्म दर्ता भएका कम्पनीको संख्या दुई सय छ वटा छ।
दर्ता भएका कम्पनीमध्ये गत आर्थिक वर्ष ८४ वटा कम्पनीको सेयर दुई अर्ब ८५ करोड ८४ लाख १९ हजार आठ सय ८६ रूपैयाँ बराबरको कारोबार भएको हो। ओटीसी बजारमा भएको कारोबारबाट गतवर्ष पाँच करोड २९ लाख ५५ हजार नौ सय ८० रूपैयाँ बराबरको पुँजीगत लाभकर प्राप्त भएको पनि नेप्सेले जनाएको छ। ओटीसी बजारमा काठमाडौं फरेस्ट्री कलेजको सबैभन्दा धेरै प्रतिकित्ता एक हजार एक सय २५ रूपैयाँमा दुई हजार दुई सय २२ कित्ता सेयर खरिदबिक्री भएको छ।
ओटीसी बजारमा सेयर कारोबार भएका अधिकांश कम्पनीको सेयर मूल्य प्रतिकित्ता एक सय रूपैयाँका दरले किनबेच भएको देखिन्छ। नेपाल स्टक एक्सचेञ्जले ओटीसी बजारको अवधारणा विकास गरी २०६४ सालदेखि सञ्चालनमा ल्याएको थियो।
नेपाल स्टक एक्सचेञ्जमा सूचीकरण नभएका, सूचीकरण खारेज भएका तथा सूचीकरणका लागि आवश्यक शर्त पूरा हुन नसेका पब्लिक कम्पनीको सेयर कारोबार तथा नामसारी नेप्सेले ओटीसी बजारमार्फत् गर्दै आएको छ। रासस