म्याग्दी- गण्डकी प्रदेशमा एक वर्षको अवधिमा एक सय ७४ किलोमिटर सडक कालोपत्र, १५ वटा सडक पुल र १२ वटा झोलुंगे पुल निर्माण भएको छ।
भौतिक पूर्वाधार विकास तथा यातायात व्यवस्था मन्त्रालयमार्फत आर्थिक वर्ष २०७९/८० मा थप चार वटा सरकार भवन निर्माण भएका छन्। मन्त्रालयले गत वर्ष समग्रमा ५७ प्रतिशत बजेट खर्च गरेको जनाएको छ। गण्डकीमा गत वर्षदेखि निर्माण भएका सडकको दिगो प्रयोग र मर्मत सम्भारका लागि हेरालु राख्न थालिएको छ।
गण्डकीमा गत आवको सहित प्रदेश सरकारले ६६८ किलोमिटर सडक कालोपत्र, ५९९ किलोमिटर सडक ग्राभेल, ८५ वटा सडक पुल र ६३ वटा झोलुंगे पुल निर्माण भएको हो। नयाँ आर्थिक वर्षमा थप ३०० किलोमिटर सडक कालोपत्र, २५ वटा सडक पुल र २० वटा झोलुंगे पुल निर्माण गर्ने प्रदेश सरकारको लक्ष्य छ।
यसपालि ३० लाख रूपैयाँभन्दा कम बजेटका टुक्रे योजना कटौती गरेको मन्त्रालयले पहिलो चौमासिकमा ठेक्का प्रक्रिया थाल्ने, बहुवर्षीय आयोजनालाई प्राथमिकता र अधुरा रहेका समस्याग्रस्त आयोजनालाई पूर्णता दिन केन्द्रित हुन मातहतका कार्यालयलाई निर्देशन दिएको छ।
गत वर्ष चुनाव, तीन पटक सरकार र मन्त्रालयको नेतृत्व परिवर्तन हुनु तथा अस्वस्थ प्रतिस्पर्धा गरेर आयोजनाको ठेक्का पारेका निर्माण व्यवसायी व्यावसायिक नहुनुजस्ता कारणले अपेक्षाकृत बजेट खर्च हुन नसकेको मन्त्रालयले जनाएको छ।
दरबन्दी अनुसारका जनशक्तिको कमी, भएका जनशक्ति पनि अधिकांश करारका हुनु, टुक्रे योजना धेरै हुनु, ठूला आयोजनामा पर्याप्त बजेट नहुनु गण्डकीमा पूर्वाधार निर्माणका योजना कार्यान्वयनमा देखिएका चुनौती हुन्। रासस